She coraa ny blaaghyn cheayll mee er y gheay Neeay, y shenn gheay Neear graihagh as litçheragh, sheer-heeidey, lieh-ny-cadley, cour y Ghreag.
"Ta ny keylljyn ersooyl, t'adsyn er duittym as er nyn vaagail; cha nel graih ec deiney orrin foast, as ta shin nyn lomarcan fo hoilshey ny h-eayst. Ta jeshaghtyn foawragh siyraghey harrish ny magheryn aalin, as ny raaidjyn oc creoi as atçhimagh er fud ny çheerey.
"Ta caayryn kanghyraagh skeaylley harrish yn 'aiyr, sheer-'eiyral 'syn oayll oc, as milley yn oie liorish lonraghey.
"Ta ny keylljyn ersooyl, O Phan, ny keylljyn, ny keylljyn. As uss foddey, O Phan, as foddey ersooyl."
Va mee my hassoo ‘syn oie eddyr daa phortagh raad yiarn rish oirr chaayr ayns Mean ny Çheerey. Er y derrey yeh honnick mee traenyn goll shaghym, fer 'sy daa vinnid; as er y jeh elley, daa hraen 'sy queig.
Va ny thieyn-greasey fargagh faggys dy liooar, as va cummey scoaghagh er y speyr er-nyn-skyn, myr t’urree ayns ashlishyn-çhiassagh.
Va ny blaaghyn ayns raad jeeragh ny caayrey vishee, as myr shen cheayll mee ad nyn badjer y ghoaill. As eisht cheayll mee, myr arrane snaue noi y gheay, coraa Phan cur oghsan daue ass Arcaid—
"Fuirree erriu rish tammylt, cha bee y lheid ayn rish foddey."
Ass The Prayer of the Flowers liorish yn Çhiarn Dunsany, çhyndaait ayms.
No comments:
Post a Comment