Jerrey'n imbagh

Ta jerrey’n imbagh er jeet nish, as ta reddyn çheet dy ve ny s’kiuney.  S’aalin eh, son y chooid smoo.  S’mie lhiam ny studeyryn ta çheet da’n lioarlann, she adsyn cree yn obbyr aym; t’ad cur bree as gennalys er y voayl, as nish ta’n obbyr hene ta faagit ayms beggan dree.  Ny yei shen, ta mee laccal beggan kiunid erreish da imbagh tarroogh as tree bleeantyn boiragh.  Ta ny smoo boirey ry-heet chammah, agh rish tammylt ta caa ain beggan fea y ghoaill.  Cha nel ny turrysee lane my vlaa foast, myr shen ta'n chaayr tostagh dy liooar.  Ta mee jus ceau wheesh traa as fondagh liorish shooyl mygeayrt dy kiune as lhiggey da reddyn lheie ersooyl.  Dy firrinagh, ta mee er ve fo 'troos rish eash er dy daink çhingys er yn ard-ven ain 'sy toshiaght, as cha bee reddyn ny share derrey jerrey'n arraghey oik ta foin 'sy touree shoh.  Agh cre'n feeu accan?  S'treisht lhiam nagh bee eh myr shoh er son dy bragh, as myr shen cha nel eh orrym agh surranse rish tammylt.  Rish jerrey'n imbagh, ta shin dooney ny s'leaie as myr shen ta ny smoo traa seyr aym er son ceaughyn traa as reddyn elley.  Lesh shen as aase ny greiney rish yn arragh, ta mee roie ny s'menkey as ta shen yindyssagh.  S'doillee dhyt credjal eh - wahll, by ghoillee douys eh y chredjal - dy vel taitnys erbee ry-gheddyn ass roie mannagh vel uss roie hannah, agh erreish dhyt geddyn barriaght er neuollanid erbee 'sy toshiaght, tra foddee oo roie tammylt gyn scuirr, ta seyrsnys as boggaghey ennagh ry-gheddyn ass jus roie, obbraghey muskylyn as lhiggey da'n inçhyn cadley.  Share dou roie roish yn obbyr, myr saase dooishtee, agh t'eh cur orrym yeearree cadley 'syn obbyr ny keayrtyn...

Red quaagh er lhiam, shen y scansh eddyr pobblaght y lioarlann ‘syn imbagh as y phobblaght t’ayn nish.  Rish yn imbagh ta pobblaght cheaghlagh ain, agh nish she lught gillyn t’ayn dy fondagh; deiney jeean as smooinaghtagh as glioonagyn oc.  Ta ny mraane cho goan as airhey, bunnys.