Friday 20 January 2012

Geaylin ghonnagh

Cha nel ram traa screeuee er ve ayms rish tammylt.  Ta shin goan 'syn obbyr; chaill shin ben da staartey noa ec toshiaght Yerrey Geuree, as va ben elley çhin yn çhiaghtin shoh chaie, as ish ny shiaghtin s'throngey ny h-imbee.  Myr shen, ta mee er n'obbraghey ny smoo na cadjin.  S'treih lhiam gra, liorish troggal as ymmyrkey rouyr lioaryn tromey rouyr keayrtyn, ta'n yeaylin aym er vaagail jeh as t'ee gonnagh dy liooar.  Cha noddym jannoo y chooid smoo jeh'n obbyr ayms myr cooneyder lioarlan, as she obbyr olk t'ayn my t'ou cur er sleih elley jannoo yn obbyr ayds.  Erreish da'n chied laa, hug yn ard-ven orrym clibbag hroggee y cheau, as myr shen ta cagh credjal dy vel arm brisht ayms.  Wahll, nagh taitnyssagh eh feddyn magh wheesh dy 'leih ta boirey er-my-hon as siyraghey dy vriaght orrym my ta mee brisht.  She studeyryn kenjal dy liooar t'ain, er lhiam.

As geaylin ghonnagh aym, cha nel eh aashagh jannoo monney.  Cha smooinnee mee rieau er wheesh dy reddyn ta feme ayd er daa arm ad y yannoo rere yn aght chadjin.  Strulley siyn: cha ren mee shen rish traa laghyn as shegin da'n co-chummalee aym ve currit ass rish shen.  Roie: cha ghow mee lheiltys erbee rish shiaghtin er y fa nagh noddym roie gyn leaystey my laueyn.  Giarrey bee.  Ceau poagey drommey, ny cooat.

Ta red ny ghaa goll er screeu aym ec y traa t'ayn, agh er lhiam nagh noddym jerrey orroo y chur derrey vees y yeaylin agglagh shoh slane reesht.

No comments:

Post a Comment