Cre'n nah ghamman?

Nish as reesht, ‘sy veggan traa t’aym nagh vel mee gobbraghey, gynsaghey çhengaghyn, screeu artyn gv.wiki ny jannoo obbyr thie aynsyn, ta mee cloie gammanyn co-earrooder. Share lhiam gammanyn cloie paart, son y chooid smoo, agh ta meiyghys ayms cour gammanyn ardane as keisht. Ec y traa t’ayn, ta daa ghamman foym; Planescape Torment as Thief II. She shenn fir t’ayn; troaryn 1999 as 2000. Agh s’mie lhiam shenn ghammanyn, dy mennick. Shynney lhiam gammanyn Infinity Engine, as ta mee goaill arrys nagh vel ad jannoo gammanyn noa lioree. Cha nel mee currit da aahroggal y co-earrooder aym dagh blein lesh stoo noa, as cha nel mee cur wheesh geill da graafaght as kuse dy ‘leih. S’mie lhiam gammanyn as skeeal drualtagh oc do noddym ronsaghey seihll noa ny çheet da quaiyllyn karracteyryn anaasoil.

Son y chooid smoo, ta mee cloie Thief II ec y traa t’ayn. Ta cooid y ghamman ‘syn ennym: t’ou uss dty vaarliagh, Garrett (fer schlei er bashtal), as t’ou brishey stiagh ayns buill as reddyn y yeid. Hoshiaght, t’ou geid ‘syn aght chadjin, agh rish tammylt ta ny meoir-shee dty lorgey, t’ou shirrey feanish jeh co-chialgyn politickagh, sollaghey-laue as kimmeeys liorish brishey stiagh ayns doonyn gildey as stashoonyn meoir-shee, as caggey (dy follaghtagh, my ta keeayl ayd – she maarliagh uss, cha nee sidoor) noi cretooryn neuvio as seyr-obbree caggee. Wahll, s’baghtal eh dy s’mie lhiam ve my vaarliagh as sleetçhal mygeayrt ‘sy dorraghys, as jannoo magh cre’n aght noddym shaghney arreyderyn as glassyn dys goaill ny ta mee shirrey er. Gowym rish dy vel cummey cooiljeigagh er nish, as tro boiragh ny ghaa: s’doillee eh lhiggey voyd aaraghyn gyn lheimmey er ard as tuittym lesh tharmane ta doostey dagh arreyder ‘syn ynnyd (as keead oardagh ry-gheddyn ass y vair-chlaare, as cha aashagh eh stiurey ny keayrtyn er coontey caslyssyn-çheerey neuvaghtal as shamyryn ta gollrish y cheilley. As ta keisht ny ghaa nagh dod mee feaysley er agh liorish art-bollee (“walkthrough”).

Ny yei shen, ta’n skeeal anaasoil dy liooar dy ‘reayll my yeill, gyn boirey orrym rouyr ny brishey stiagh er bun y ghamman: sleetçhal as geid. Chammah’s shen, ta karracteyr fondagh ayd (maarliagh schlei as granganagh) agh cha nel ad jannoo eab eh y ro-veenaghey, as myr shen, ta reamys ayds shen y yannoo. Ta’n Garrett ayms pragmatagh dy liooar; t’eh geid nhee erbee ta ry-laue, agh cha nel eh jummal traa rish ronsaghey lane thie er son buill ‘olliaghtagh. Cha nel eh marroo arreyderyn mannagh vel eh fo gaue baaish er y chooyl, agh ad y harnoal; cha nel marrooder t’ayn. As t’eh jannoo reddyn magh as magh; share da goll strooid lane stashoon arrey dy saaseagh as tarnoal dagh arreyder fer as fer, as eisht y voayl y ronsaghey ayns shee, na roie mygeayrt as jannoo dagh ooilley red ad hoc gyn plannal erbee. Agh oddagh oo cummey Garrett eddrym ‘sy chree ta goaill taitnys ass boirey arreyderyn as cur orroo shirrey er er feie ny caayr, ny fer feayr-fuiltagh ta lhiggey ad gyn faitys.

Erreish dou roshtyn jerrey ny gammanyn shoh, bee’m shirrey er fer noa, as hug my ner dy vel CGP noa er jeet magh: Skyrim. She obbyr Bethesda t’ayn; cha row aigh vie aym bentyn rish ny gammanyn elley oc (v’ad failleil dy mennick), agh er lesh ram sleih dy vel eh feer vie. T’ad cur moylley da seihll mooar as gyn lhiettrimyssyn boiragh, da graafaght ghoys yn ennal jeed, as caggaghyn creesee as feniaghtagh.

Oh, Skyrim. I really am so enamoured by your peaks, and your misty valleys. Oh, what a beautiful world, filled with possibility and with cheese. Oh, Skyrim, let us bask in the the spook of your ghosts and squirm in the horror of your catacombs. Let us be gleefully smacked about by giants and devoured by dragons. Let us steal hats and trade them for unexpected potions. Oh, Skyrim. There’s so much to you that there are even ants crawling on this log! Blimey.

(Jim Rossignol, User Interfarce: Skyrim's Silly Choices er Rock, Paper, Shotgun)

"Skyrim" sieht verdammt gut aus! Der tolle Look zeigt sich vor allem in den Außenbereichen: Die riesige lebendige Spielwelt fasziniert an allen Ecken und Enden: Windböen wirbeln Schnee auf, Pflanzen bewegen sich sanft im Wind. Es ist eines der wenigen Spiele, in denen die Vegetation ihren Namen auch verdient... Gäbe es in der Games-Branche eine Auszeichnung für das beste Preis-Leistungs-Verhältnis zu gewinnen, Bethesda Softworks hätte sie sicher! Ein solches Spielemonster hat es noch nicht gegeben.

(Welt.de, Riesiges "Skyrim" ist das Rollenspiel des Jahres)

Ta shen clashtyn dy mie dou, gyn ourys, as ta ny feeshanyn-cleaynagh jeeaghyn dy mie chammah. Er y laue elley...

• ta ny Karracteyryn Seyrey ommidjagh rere cliaghtey
  
• t’ad cur magh clampyn ta jannoo reddyn ny smessey as shimmey fout t’ayn foast gyn clamp.
• ta co-eddin lane lheibeidjagh echey
  
• she co-hroggal PC as “console” t’ayn, as t’eh jeeaghyn nagh ren ad y saase stiuree y vaare-hareaghey (“optimise”) da’n ghaa ‘er. Myr shen ta troyn ayn nagh vel cooie da PC.
• as t’eh ort eh y chloie liorish Steam, corys ta mee rieau er shaghney. Cha nel fa erbee aym y co-earrooder aym y chur fo bondiaght chlaare. Ta ymmydyn ec Steam, ta mee goaill rish shen: t’eh lhiggey dhyt laadey neose gammanyn reesht, tashtey fys cloie er yn eddyr-voggyl, as reddyn elley. Er y laue elley, ny keayrtyn, t’eh neulhiggey dhyt cloie, ny eer glassey magh slieh ass yn çhirveish as dagh ooilley ghamman t’oc. Cha nel mee son lhiggey lesh reagheydys da colught ennagh; s’lhiams eh y co-earrooderyn as ny gammanyn myrgeddin. My ta feme aym er karraghey ennagh, er lhiam, foddym eh y laadey neose jeed, gura mie ayd; cha nel mee shirrey ort eh y vroojey orrym dy folliaghtagh. Chammah’s shen, ta lheid ny shirveishyn stiuree nyn munyn doilleeidyn bentyn rish ymmyd arraghyssyn (“mods”), obbyr ard-jeeaneyderyn ta shareaghey ny mooadaghey gammanyn, ny karraghey reddyn nagh charree y colught hene.

Myr shen, ec y traa t’ayn t’eh orrym gamman elley y gheddyn, er lhiam. Tybed c’red ta ry-gheddyn veih 2001?