Y Balley Follym

Va'n skeeal shoh (screeuit aym) er y shenn ynnyd-eggey aym, as shen caillt foddey er dy henney. Shoh eh reesht.

This story of mine was on an old website, long vanished. Here it is again.

Y Balley Follym

Laa dy row, va guilley ayn, as Perick yn ennym er, as v'eh markiagh y daawheeyl echey trooid y valley. Nish va Perick er n'eiyal ro anmagh y laa shoh, as nish hooar eh lhiettrimys 'sy raad thie. Va cuighlinyn traaght ayns linnaghyn er y 'traid, as cleigh harree, as y raad hene, v'ee cleiyit as giarrit liorish ny JCByn bwee mooarey va daunsey ayns shen. Myr shen, ghow Perick toshiaght shirrey raad thie elley, as ren eh markiagh trooid straidyn nagh row eh er n'akin rieau roie. Haink eh fy yerrey dys goal 'sy raad; er y laue yesh jeh, lheanee y straid cho cadjin as red erbee, as gleashtanyn as coir trustyr aynjee; agh er y laue hoshtal, by ghaaigit ee as fo joan, gyn gleashtan erbee ry-akin, as va lossreeyn goaill toshiaght gaase trooid ny gaaigyn. Ny yei shen, va'n raad ayn, as ee sheeynt shiar, dys y thie echey. As çhyndaa eh y daawheeyl echey as ren eh markiagh ersooyl shiar harrish y raad vrisht.

Nish giare ny yei, lhaggee thieyn skeoigh y valley, as va Perick ny lomarcan. Va boallaghyn sheeyney seose er çheuyn y raad, shenn voallaghyn breekey jiarg, as scaaghyn phosteyryn orroo, as faiyr gaase mastey ny gaaigyn. Raad by injil ny boallaghyn, honnick eh ny troggalyn nyn gooyl: straihyn jeh thieyn, as buird er dorrys as uinniag, as shimmey brat shenn ghraffiti orroo; thieyn stoyrey mooarey follym, as blass eash sleityn orroo, as surranse as niart; troggalyn offish, as uinniagyn mynvrisht oc, as ad gyn sollys erbee. Lurg tammylt, honnick eh cretooryn garraghey 'sy traidyn, teiy nyn raad mygeayrt y voghlaneys as skeetal roish rish ny voallaghyn. She roddanyn v'ayn, fir vooarey, as fammanyn gollrish ard-nieughyn oc; as foillanyn pabyr-vaney scraaghey 'sy chiuney. Va reddyn elley ayn myrgeddin: va beisteigyn-grobbagh ceau drilleeyn 'sy dressyn, as tin-tarkyn keillit blakey er Perick lesh ny sooillyn folliaghtagh oc; as ren liauyree cheyley skyrrey ersooyl tra hayrn eh er-gerrey daue, as nyn oltyn gollrish ushtey. Eisht honnick Perick fiorag ny soie 'sy raad, as ee freayll arrey ersyn, as tra haink eh rish y çheu eck, lheim ee da.

"Goll y raad cheddin?" denee yn 'iorag; as er y fa dy row eh, lheim yn 'iorag er boayrd y daawheeyl as ren ad markiagh roo. Nish hie Perick raad trooid cruinniaghey thieyn stoyrey, as ooilley mygeayrt-y-mysh she breekyn v'ayn, er croo keynnagh, as scadooyn ard; as eisht nagh nee tost v'ayn. Cheayll eh polt-polt-polt myr drum foddey jeh, as yn 'iorag cabberey da.

"Mark son dty vea!" dooyrt yn 'iorag; as varkee Perick. Foast hayrn y polt-polt-polt er oaie, ny s'faggys as ny s'ardjey lesh dagh cassey jeant echey. Yeeagh eh er e chooyl as honnick eh red ennagh eiyrt er, roie dy staghyllagh, agh dy tappee neesht. Ny yei e share as ooilley, cha nod Perick dy shaghney. Haink y cretoor ny lurg, as cheayll eh tharmanaghey voallaghyn as smoashal uinniagyn lesh y cretoor traaue dy choair dy jeeragh.

"Toshtal!" dooyrt yn 'iorag, as hyndaa Perick toshtal. Nish foddee eh fakin y cretoor tra yeeagh eh erash: carn breekyn foawragh ayns cummey dooinney, lurgaghyn gollrish biljyn as armyn gollrish pillyryn-lettragh. Va aae ghroghad roish, as roie eh da cho tappee as nod eh, as y veisht vreekyn kiart er e 'amman. Sheese y lhargagh hie eh as stiagh 'sy thiollane, as hie eh ny hrooid gollrish bullad trooid gunn, agh by vooar y veisht as by veg yn aae. Woaill ish y droghad ec bieauid ny geayee, cho niartal as traen tappee; as hie e kione ny hrooid dy mie, agh daag eshyn e chorp ny yei. Eisht yllee y veisht dy tarmaneagh, as vrish ee ayns peeshyn, as cha row agh dash breekyn brisht ayn. Myr shen, vannee Perick yn aigh echey, as hug eh booise da'n 'iorag son sauail e vea; as chroymm ish. Scarr ad ec jerrey raad Pherick, as ersooyl lhee gyn fockle ny smoo.

Nish cha nee traa liauyr v'ayn derrey deiy Perick ro anmagh reesht, as hooar eh y raad thie meecheimagh foast. Eisht hyndaa eh rish y 'traid, as haink eh reesht 'sy ghoal: er y laue yesh, straid cadjin; er y laue hoshtal, raad vrisht, follym. Smooinee eh er y breekyn-beisht, as v'eh foym goll my yesh; agh by anmagh eh, as cha row traa dy yummal echey, as myr shen hie eh my hoshtal reesht.

S'leah dy liooar haghyr eh er yn 'iorag, as ish fuirraghtyn 'sy raad, as scuirr eh son failt jee y chur. Lheim yn 'iorag er voayrd, as ersooyl lhieu hiar rish y raad.

"Cre'n boayl shoh, fiorag?" denee Perick.

"She'n balley follym t'ayn, er ny yarrood as faagail ny yei, as y vooinjer neuvaghtal cummal aynjee," dooyrt yn 'iorag. "S'mea y cheynnagh, as ta idd roddanyn as beisteigyn-grobbagh 'sy voallaghyn, as ta reddyn elley sleetçhal ayns ny corneilyn."

As varkee ad trooid y Valley Follym, ayns tostid y fastyr, as foillanyn scraaghey er-nyn-skyn. Haink ad dys straid fo ymmodee carnaneyn pabyr, jeh dagh ooilley sorçh. Va pabyryn-naight ayn, as lettyryn, as meeryn as mynghiarraghyn, ayns carnaneyn fud-y-cheilley cho foddey as honnick ad. Cheayll ad sonsheraght y phabyr er y gheay, as shen gaase ny s'ardjey. Eisht va'n sheean cooyl oc, as haink fys er Perick nagh nee sheean y gheay v'ayn.

"Mark son dty vea!" dooyrt yn 'iorag, as varkee Perick. Foast haink y sannish-sannish-sannish nyn lurg, ny s'faggys as ny s'ardjey lesh dagh çhyndaa jeant echey. Yeeagh eh erash, as honnick eh red ennagh çheet ny lurg, as eh snaue roish dy gastey as dy graynoil. Gyn scansh da eabbey Pherick, ny lurg haink eh, as yoltee eh ny straidyn gollrish argid bio. Woaill cree Pherick dy creoi, as v'eh tayrn ennal dy trome.

"Toshtal!" dooyrt yn 'iorag, as toshtal lhieu. Sheese greeishyn haink eh lesh bwoalley as builley, as dobbyr da tuittym jeh'n daawheeyl. Nish yeeagh eh erash, as honnick eh'n chretoor dy baghtal: she cront mooar bane baggyrtagh v'ayn, as cummey beishteig er, as gob gollrish thiollane raad yiarn. Dobbree eh ny coshallyn cho tappee as nod eh, rish broogh yn ammyr, as ushtey sliee orroo. Snaue y veishteig foast ny lurg, as ratçh ad rish yn ammyr, scollag as scaaillagh, as y cassan sheer-cheyllaghey. Ren geaylin Pherick screebey er y voalley, as ren eh strepey son cormid, derrey haink skeoll mooar ny lurg, as dennee eh ushtey spreih er. Va'n cassan er çheet dy ve ro cheyl, as y veishteig vooar vane er duittym stiagh 'syn ammyr, raad d'aase ee liorish ushtey, as chammee ee, as haink ee veih-my-cheilley dys thousane thousane meer pabyr slane fliugh. Myr shen, vannee Perick yn aigh echey, as hug eh booise da'n 'iorag son sauail e vea; as chroymm ish. Scarr ad ec jerrey raad Pherick, as ersooyl lhee gyn fockle ny smoo.

Agh laa giare ny yei lurg shen, by ard yn ghrian as by ghiare scadooyn vunlaa. Va kirbyl fuirraghtyn 'sy thie, as Perick foddey jeh er çheu elley jeh'n valley. Y trass cheayrt haink eh 'sy raad echey, as y trass cheayrt by veecheimagh eh. Myr shen, hug eh mollaght er yn aigh echey, as smooinee eh dy liauyr as dy trome as dy dowin derrey ren eh y briwnys; agh y trass cheayrt hyndaa eh my hoshtal reesht.

S'leah dy liooar haghyr eh er yn 'iorag, as ish fuirraghtyn 'sy raad, as hayrn eh er ny glackanyn. Ren ee brebbal e famman, as lheim ee er voayrd, as ersooyl lhieu hiar rish y raad. Fo'n sollys çheh, bwee, by ghlassey as nod ad ny feial, as dagh gaaigey baghtal as doo er ny breekyn. Ren ny beisteigyn-grobbagh çherr mastey ny scaanaghyn, as cheayll Perick kesmadyn y vooinjer neuvaghtal siyraghey ersooyl rish eh çheet orroo. Skeet cummaghyn fynneydagh rish ny boallaghyn gyn kiarail erbee da, as fo'n sollys soilsheanagh she seihll elley v'ayn, ny scadooyn ecksh ro ghowin dy ve firrinagh, as ny daahghyn ro lane.

Hie y raad trooid ardaneyn raad va biljyn nyn soie, skeoighit foddey-er-dy-henney, nish gaase ayns cummaghyn feie; as coyryn trustyr lhome-lane deayrtey ny shenn chummal oc harrish ny cassanyn. Va stainnaghyn ayn fo smooirane ruy, as boteilyn mynvrisht, as plastagh follym, as craueyn. Eisht, jeeragh roish, honnick Perick troggal mooar, as eshyn falleayssaghey as lonnraghey, as y ghrian aahoilshaghey da er thousane uinniag, as rolteen brisht jeh dagh fer jeu.

Scuirr Perick ec y voal injil mygeayrt y troggal, as ghrapp eh y boal son dy yeeaghyn er ny share. Honnick eh magher feayn terrvacadam, raad va craueyn ghleashtanyn foast nyn soie, mergaghey, as y daah oc speeinit ersooyl foddey er-dy-henney; as foddey jeh va sleih ry-akin, shooyl mygeayrt y troggal.

"Cre'n voayl shoh, fiorag?" denee Perick.

"Shoh yn ard-lhiaght, as ny beishtyn cummal ayns shoh," as yn 'iorag. "Ta tree beishtyn freayll arrey er y valley follym, as cur magh ny cretooryn oc er y çhelg son adsyn ta çheet stiagh aynjee. By lhieusyn y foawr breekagh, as by lhieusyn y veisteig phabyr; as eaisht! ta mee clashtyn y treeoo fer."

As deaisht Perick, as cheayll eh sheean 'syn aer chiune. Va cling-clabber-claggeraght ry-chlastyn, çheet dy ve ny s'ardjey, ny s'faggys; as lesh çhyndaa, honnick eh kay çheet sheese y raad nyn guaiyl.

"Mark son dty vea!" dyllee yn 'iorag, as varkee Perick. Kiart roue va'n troggal ny hoie, gyn goal erbee, gyn briwnys, as kiart ersyn roie ad. Foast dardjee y cling-clabber-claggeraght, tra v'ad slewal eddyr ny gleashtanyn marroo, as roie dys y hroggal yl-vrisht. She kay vuirrooghagh v'ayn nish, gullal gollrish dorrin, kay jeant jeh smooirlee as scarrickyn. Eisht va dorrys çhyndaaee foue, as lheim ad sheese as heiy ad ny hrooid, dy moal agh dy corrym. As y veisht, cha nod ee fosley'n dorrys, agh roie ee dy jeeragh noi. Nagh tharmaneagh y feiyr tra v'ee mynvrishey! Stainnaghyn as boteilyn as paggaidyn as craueyn, smoash ad noi y dorrys as ersooyl lhieu, as ec y jerrey, cha row agh boanlagh cadjin ny lhie ayns shen. As vannee Perick yn aigh vie echey, as bare lesh goll; agh coraa ny lurg, hug eh er moostey, as hyndaa eh.

"Fastyr mie, y ghooinney," as y choraa, as ish feagh as meen. V'ad nyn shassoo ayns far-hamyr mooar as lhean, as va boayrd ayn, as cretoor er e chooyl. Va cummey quaagh er y pheiagh, lane dy h-uillinyn as scadooyn, as by dooillee fakin eh. Son shen, va Perick wooisal dy liooar. "Cre'n aght noddym cooney diu y chur?"

"Ta poinsheil ain," as yn 'iorag, "ec un er y chlag," as snog y peiagh.

"Immee-jee 'syn troggeyder," as eshyn, as chowree eh dys muinney y hroggal. Myr shen, hoill stiagh ad ayns cartage corradoyryn, as dagh fer jeu kiart gollrish ny fir elley. Va pabyr boalley roostey ooilley mygeayrt oc, as dagh shey trie va jalloo ayns clowan scaant, as dagh feed trie va dorrys. Agh by fioghit as ersooyl ny h-earrooyn oc, as er cooyl ny dorryssyn va sheeanyn quaaghey as agglagh ry-chlastyn, as cha ren Perick bentyn roo er chor erbee.

Eisht lheeanee ny corradoyryn dys halley anvaaragh. Foddey er-nyn-skyn va'n sar-vullagh ny lhie, as straihyn liauyrey dy 'troo-hoilshagey marroo er, agh cha daink sollys erbee agh trooid ny h-uinniagyn mynvrisht, as v'adsyn boallaghyn y çhamyr. Va'n halley lane dy cooid hie tholtanagh. Er ny buird va jeshaghtyn nyn lhie: çhellveeishanyn as eddin follym oc, as craueyn co-earrooderyn, as radioyn marroo rish foddey. Nish tra haink Perick stiagh 'sy halley, ren eh meekey ayns yindys, er y fa dy row çhionnal sleih ayn, thousaneyn jeu. V'ad nyn soie as nyn shassoo er fud y halley, as cullee dorraghey oc, agh cha row sheean erbee ry-chlashtyn.

"Cre shen?" denee eh jeh hene, as hooill eh daue son dy loayrt roo. Agh as eshyn shen y yannoo, honnick eh dy row eh marranagh. Cha nee sleih v'ayn, agh cretooryn ayns cummey sleih. As va ny cullee oc jeant jeh poagaghyn coyrey, as ny lheinaghyn jeh pabyr, as va ny laueyn oc nyn laueanyn ceaut ersooyl; as cha row king erbee oc. As myr shen, ga dy ren ny cretooryn çhyndaa son dy yeeaghyn er Perick, cha nod eh loayrt roo; as hooill eh roishyn.

Ec y jerrey, haink ad dys dorrys yiarn va cowraghey yn troggeyder. Stiagh laue, as v'ad çheet neose, as neose, as neose, car minnidyn liauyr as ard-liauyr. Eisht doshil y dorrys, as hie ad magh, stiagh ayns entreilys keyl roish dorrys mooar, fuyghagh.

"Er cooyl y dorrys shoh ta ny beishtyn cummal," dooyrt yn 'iorag, va ny soie er geaylin Pherick nish. "Stiagh lhien, as bee cooyrtoil, as er dty hwoaie son caa! As bee shin thie bio reesht, foddee."

Myr shen, ren Perick lheanaghey e gheayltyn, as crankal er y dorrys, as yllee magh coraa sthie: "Çheet stiagh!" Eisht leaystee y dorrys dy lheean as dy moal erash stiagh 'sy çhamyr, as honnick eh ny v'aynjee. She halley ard-vooar v'ayn, as collooyn nyn shassoo ard er-e-skyn, as va'n far-vullagh fo keyll dy hoilshaghyn; agh va dagh fer jeu brisht. Va'n brat laare jiarg meein as duinid fo e chassyn, as va cochaslysyn airh-oirrit mygeayrt ny boallaghyn. Ayns ynnyd un voal va uinniagyn gyn earroo, dagh fer ny smoo na Perick, as dagh fer mynvrisht; as va sollys airhey çheh souree lhieeney stiagh nyn drooid. Nish ayns mean y halley va boayrd mooar cruinn jeant jeh mahoganee s'dorree, as va tree sleih nyn soie mygeayrt echey as ad loayrt, gyn cur geill erbee dasyn. Eisht ghow Perick creeaght, as hooill eh nyn guaiyl.

Nish b'eer whaagh ny eaddagh oc: cheau dagh fer cullee, fer jeu doo, fer jeu bane as fer jeu airhey. Va breidyn jeh geiyn yskyn mygeayrt oc skell as meekey lesh thousane daah, as mygeayrt nyn ging va crooinyn jeh scroggyl cassit, as va far-eddinyn orroo. Va cummey deiney orroo, agh ghleaysh ad gollrish geinnagh as darree ad gollrish dhianeyn, as aaheeney ny coraaghyn oc orroo hene. Va dash dy vreekyn roish y fer doo, as dash dy phabyr roish y fer bane, as juist dy 'ooillagh roish y fer airhey. Myr shen, va fys er Perick dy nee adsyn by vie lhieu marroo eh, as reill eh arrey noi caa.

"Quoi s'lhoys da cur stiagh orrin?" yllee y veisht ghoo-choamrit, as woaill ee y voayrd lesh doarn trome, as ren ee grouigey er trooid yn 'ar-eddin eck.

"She mish Perick," dreggyr eh, as hug eh leshtal daue.

"Cre'n aght haink uss dys shoh?" yllee y veisht vane-choamrit, as ren ee buirrooghey.

"Haink mee trooid y Valley Follym," as Perick.

As y treeoo veisht, airhey-choamrit, yeeagh ee er rish traa liauyr. Eisht dooyrt ee "Soie sheese!"; as hoie eh.

Eisht loayr ny beishtyn rish tammylt mie er yindyssyn y reeriaght. Loayr eh mychione y lught dy hirveishyn hug biallys da'n mian sloo oc, as ny beishteigyn agglagh dod ad symney jeh uillinyn follit y valley, as y jerrey harragh er quoi erbee yinnagh trespass 'sy valley follym. Dinsh ad eshyn da lesh coraaghyn jeeaney as ad feeacklaghey dy dewil, as ren Perick bibbernee, agh cha row aght scapail echey foast.

Eisht ghow ad toshiaght arganey er ny lhisagh ad jannoo da. Va'n cretoor doo-choamrit son raipey eh ayns peeshyn son bee ny shirveishyn oc, as va'n cretoor bane-choamrit son cur eh fo glass ayns pillyr lettyragh rish keead. Agh y fer airhey, v'eh jeeaghyn dy ve y fer smoo scanshoil, as dooyrt eshyn dy lhisagh ad jannoo beishteig da.

"Nagh vel eh er stroie ny tree shirveishyn ain? B'chair eh eshyn ayns yn ynnyd jeu y chur," as eh, as snog ny fir elley. V'eh jeeaghyn dy row briwnys jeant oc, as va Perick er creau ny smoo as ny smoo, er son nagh row caa erbee dy scapail ry-akin. Agh reill yn 'iorag ny tost er e gheaylin, as hug ee bassag gherjoilagh da.

Eisht haink paays mooar er ny beishteigyn tra loayr ad, as hyndaa ad dys Perick.

"Eaisht rhym, ghuilley," as y chied, "cur lhiat caffee dooin!"

"Duinid as dorraghey!" as y nah.

"Millish as mea!" as y treeoo.

Va boayrd liauyr ny hoie faggys daue, cho liauyr as barroose, as v'eh lane dy choirraghyn beggey as cappanyn, poanraghyn caffee as pashyn caffee, speinyn as shugyr as skaalyn. Gyn eie elley er ny lhisagh eh jannoo, hie Perick da as ren eh caffee daue ooilley tra smooinee eh er y chooish. Ren eh caffee dorraghey as millish as mea, as hug eh eshyn stiagh ayns tree cappanyn mooarey jeh obbyr chray. Hug eh cappan da dagh beishteig. V'adsyn cho trome fo resoonaght, ghow ad y caffee as slug ad eh gyn eer blass eh, as yllee ad son cappan elley.

"Nish, Pherick," as yn 'iorag, "shoh dty chaa!"

Eisht ren eh ny smoo caffee daue, cho doo as dooid, as çheh gaalagh; agh ayns ynnyd jeh shugyr, cheau eh stiagh ayn dash mooar dy hollan. Eisht deayrt eh magh y caffee saillt ayns tree cappanyn elley, as hug eh un chappan roish dagh beishteig. Hrog ad ny cappanyn cooidjagh, as dyrjee ad nyn ging, as slug ad y caffee sheese.

Nagh atçhimagh y keayney v'ayn! Ghow ad greimmey er ny scoarnee oc, as ren bodjallyn mooar dy ghaal lhieeney magh ass nyn meill. Vrooillee ad ayns joaney; as ny scadooyn oc, snaue adsyn ersooyl tessen y laare as skell ad roish ayns ny boallaghyn. Cha row agh ny breidjyn faagit jeu, as ny crooinyn dy scroggyl cassit, as ny tree far-eddinyn.

Eisht ghow Perick ny breidjyn as crooinyn as far-eddinyn, as dymmyrk eh adsyn trooid y troggal, as yn 'iorag er e gheaylin foast. Honnick ooilley ny cretooryn ad, as hoig ad dy row ny beishteigyn marroo; as woaill ad bassyn, as yllee ad son boggey. Hrog ad y guilley as dymmyrk ad eshyn 'syn aer, trooid ny corradoyryn liauyr, neuheiltagh; as shaghey ny dorryssyn gullagh; as magh ass ayns sollys ny greiney. Eisht hoie ad eh sheese, as skell ad roish ayns dy chooilley raad, derrey nagh row agh Perick as yn 'iorag ry-akin.

Eisht ghow Perick y daawheeyl echey as ersooyl lesh, trooid ny straidyn lhoobagh as brisht, raad daase faiyr trooid y terrvacadam; as shaghey ny boallaghyn ardey as boghlanagh, gyn boirey ny imnea erbee, derrey haink eh dys creeagh y valley follym; as scuirr eh ayns shen.

As son y treeoo cheayrt hug eh booise da'n 'iorag; as chroymm ish, as lheim ee jeh'n daawheeyl, as scarr ad ayns shen.

Haink Perick thie dy traa son kirbyl. As y nah laa, tra varkee eh y daawheeyl, va'n raad thie karrit, as ny jeshaghtyn ersooyl, as y raad glen; as hie eh er y raad shen as e chree eddrym , as cha smooinee eh er y valley follym reesht arragh.

Geay as Kay

GEAY AS KAY

"Jean raad dooin," as yn Gheay Hwoaie, as eshyn sheidey harrish y cheayn er obbyr ennagh shenn Gheuree.

As honnick eh roish y kay lheeah toshtagh ny lhie rish ny tideyn.

"Jean raad dooin," as yn Gheay Hwoaie, "y chay neufondagh, son mish ben-toshee Gheuree 'syn çhenn chaggey noi ny lhongyn. Ta mee cur ad bun-ry-skyn er niart tuittymagh, ny ceau orroo ny binn rioee marrey foawragh. Ta mee getlagh harrish faarkey mooar tra t'ou uss snaue meeiley. Ta keayney ayns buill çheerey erreish dou çheet quaiyl ny lhonyn. Ta mee geiyr ad er ny claghyn myr bee da'n cheayn. Raad erbee ta mee çheet rish, t'ad croymmey da'n Çhiarn Gheurree."

As cha dreggyr y kay fockle erbee noi y voggys sonnaasagh shen. Agh dirree eh dy moal, as skyrrey jeh'n cheayn; ren eh snaue seose glioonyn liauyr as feddyn kemmyrk ayns ny crink, as cheeir yn oie chiune orrin. As ayns kiuney ny hoie ghow y kay toshiaght mungley, as cheayll mee eh gaaloayrt skeeal anghooagh y chraght agglagh va jeant echey. "Queig-jeig galleonyn shenn Spaainey as keead, lhong hraghtee vooar daag Tyre, hoght lhuingyssyn-eeastee, kiare feed lhong cochaggee as jeig, daa-yeig lhonyn caggee fo hiauill as ny gunnyn oc, kiare feed baatey-awiney shiaght as tree cheead, daa haagh traghtee as daeed as spiosyn ayndaue, jeig birlingyn as feed, lhong caggee noa-emshiragh as feed, nuy thousane ard-varree..." vungil eh as eh geayrey, neayr's dirree mee dy tuittymagh as çhea voish e 'enish atçhimagh.

---

WIND AND FOG

"Way for us," said the North Wind as he came down the sea on an errand of old Winter.

And he saw before him the grey silent fog that lay along the tides.

"Way for us," said the North Wind, "O ineffectual fog, for I am Winter's leader in his age-old war with the ships. I overwhelm them suddenly in my strength, or drive upon them the huge seafaring bergs. I cross an ocean while you move a mile. There is mourning in inland places when I have met the ships. I drive them upon the rocks and feed the sea. Wherever I appear they bow to our lord the Winter."

And to his arrogant boasting nothing said the fog. Only he rose up slowly and trailed away from the sea and, crawling up long valleys, took refuge among the hills; and night came down and everything was still, and the fog began to mumble in the stillness. And I hear him telling infamously to himself the tale of his horrible spoils. "A hundred and fifteen galleons of old Spain, a certain argosy that went from Tyre, eight fisher-fleets and ninety ships of the line, twelve warships under sail, with their carronades, three hundred and eighty-seven river-craft, forty-two merchantmen that carried spice, thirty yachts, twenty-one battleships of the modern time, nine thousand admirals…." he mumbled and chuckled on, till I suddenly rose and fled from his fearful contamination.

---

Ta'n skeealeen shoh çhyndaait ass A Mistaken Identity liorish yn Çhiarn Dunsany. Ta'n lioar vunneydagh ry-lhaih er Project Gutenberg.

Cooinaghtyn joaney

"Insh dou, my sailliu: cre ny reddyn share ayns bea deiney? Son ta mee er shooyl ny bleeantyn as çheeraghyn dys jeeaghyn er ny yindyssyn oc, as cha nel freggyrt aym foast."

As smooinnee ish rish tammylt, as cur meir e laue trooid y folt dhone, roish my dreggyr ee: "Slaynt mie, as cooinaghtyn mie; as fys y ve ayd dy vel kuse elley ry-yannoo foast. Nagh nee oo soie sheese marym, charrey joarree?"

"Gura mie eu, y faaishneyr, agh cha nel mee cooie dy hoie mayrt as mish my choamrey joanagh."

"Quoi faaishneyr? Cha nel mee agh my hroailtagh, as shimmey slieu as slyst ta mee er ny hooyl roish my dooar mee collooghyn caillt y çhenn halley shoh as skeabey y joan voue. Nish soie sheese, y charrey, as verrym feeyn as bee dhyt; son she oie aalin lane rollageyn vees ayn, as shimmey oor t'ayn roish irree ny greiney. Insh dou ny yindyssyn t'ou er nyn vakin, son cha nel shin ooilley agh troailtee 'sy teihll quaagh gyn yss, shirrey feaysley nagh vel ayn. Lhig dooin feddyn caarjys as taitnys jeh oie chiune lane skeealaght roish my scarrmayd reesht. As bee shen cooinaghtyn elley."

Yn Scaa Harrish Innsmouth: Yn Eiraght

She fliaghey meein ny mairagh ghooisht mee ass y neealloo v’orrym ‘sy yiarrey crouwagh shid, as rish snapperal magh dys y raad roym, cha dooar mee lorg coshey erbee ‘sy laagh oor. Va’n soar eeastagh ersooyl myrgeddin. Heeyn seose mullee vrishtey as speekyn lieh-lhieggit Innsmouth dy lheeah ‘syn çhiar yiass, agh cha chronn mee bioag erbee ‘sny reeastyn gortey ooilley mygeayrt aym. Va’n ooreyder aym bio foast, as cowraghey magh dy row eh lurg munlaa.

Cha row rieaughid ny haghyr dou baghtal ‘syn aigney aym er chor erbee, agh dennee mee dy row red ennagh graney bentyn rish. Begin dou scughey jeh Innsmouth drogh-scaagh—as myr shen ghow mee toshiaght prowal y niart shooyl aym, fo arkfeh as skeeys. Erreish da tammylt liauyr, gyn scansh da annoonid, accrys, scoagh as shaghrynys, hooar mee dy dod mee shooyl; as hie mee roym dy moal er y raad laaghagh cour Rowley. Roish yn oie va mee ‘sy valley veg shen, feddyn bee as reaghey eaddagh cooie dou hene. Hie mee dys Arkham er y traen oie, as mairagh loayr mee dy liauyr jeean marish fir-oik ny reiltys; v’eh orrym aaloayrt y clane ayns Boston myrgeddin. Ta fys ec y theay er ard-eiyrtys y resoonaght shen nish—as, son cadjinys, dy row shen jerrey y skeeal! She baanrys ta jannoo orrym nish beggan er veggan—agh foddee, ta scoagh smoo—ny yindys smoo—sheeyney magh.

Widdershins 'sy Ghaelg!

Naight greesee! Wahll, dooys aghterbee...

Erreish da tammylt agglagh (t'eh orryms son y chooid smoo), ta lhieggan Gaelg y caslys-skeeal Widdershins: Sleight of Hand ry-gheddyn nish myr PDF nastee, çhyndaait ayms. As ta, ta kied kenjal Kate aym son y lhieggan shoh!

She skeeal yindyssagh t'ayn, lane contoyrtys as aitt, as ren mee my chooid hare shen y chowraghey 'sy Ghaelg myrgeddin.

Gura mie ayd da kuse dy chaarjyn hug coyre dou 'syn obbyr.

Exciting news - for me, at least...

After a really excessively long time (mostly my fault) the Manx edition of Widdershins: Sleight of Hand is now available as a free PDF, translated by me, with the very kind permission of the author Kate.

It's a really excellent story, full of adventure and fun, and I did my best to portray that in the Manx version.

Thanks to those friends who gave kind advice in the work.

Yn Scaa Harrish Innsmouth: Y Raad Yiarn

Sleetçh mee stiagh ayns halley yn ‘astee treigit aym, as cur tastey jeean da caslys-balley y yilley groseyragh lesh y lostan poagey. She roshtyn y shenn raad yiarn va’n cront preaysagh aym nish. Cha by vie lhiam goll erash tessen goal foshlit Washington, chamoo shooyl my heear er South Street, as ish ny straid lhean agglagh gyn fastee. Heill mee dy beagh eh sauçhey goll roym dys Babson Street, as eisht my heear cour Lafayette. Veagh eh orrym goll mygeayrt boayl feayn elley—agh cha nhegin dou goll tessen eh—as eisht my heear as my hwoaie reesht er linney camstram trooid straiddyn Lafayette, Bates, Adams as Bank, bentyn rish clash ny h-awin ‘sy fer s’jerree, derrey roshym y stashoon treigit tholtanagh honnick mee voish yn uinniag.

Hie mee magh reesht, as goll tessen dys çheu yesh ny straiddey son dy skeetal stiagh ayns Babson gyn vaght my dod mee. Cheayll mee kiaullane ayns Federal Street foast, as lesh cur shilley bieau m’oi, er lhiam dy vaik mee falleays faggys da’n thie haink mee ny hrooid. Va mee gimney scapail Washington Street nish, as ghow mee toshiaght lieh-roie dy kiune, croghey er aigh nagh duittagh sooill arreydagh erbee orrym. Rish corneil Babson Street, ghow mee aggle lesh fakin dy row cummaltee foast ayns thie dy row, rere ny curtanyn ‘syn uinniag; agh cha row sollys erbee aynsyn, as hie mee shaghey gyn cragh.

Yn Scaa Harrish Innsmouth: Er Çhea

Rish shallid, chum mee my ennal sthie as farkiaght. Hie eashyn shaghey, as er lhiam dy yeyree soar eeastagh jiooldagh yn aer dy doaltattym. Eisht ren ad cronkal reesht—gyn scuirr, as sheer-niartaghey. Hoig mee v’eh orrym arraghey, as hayrn mee boltey y dorrysh kianglee twoaie çhelleeragh. Niartee mee son brishey y dorrys; va’n cronkal ardjaghey foast, as by hreisht lhiam dy beagh eh keiltyn sheean ny h-obbyr aym. Fy-yerrey ghow mee toshiaght builley er y phannylys thanney reesht as reesht lesh y yeaylin hoshtal aym, gyn scansh da pian ny craa. Ren y dorrys shassoo ny smoo foast na yerk mee rish, agh cha scuirr mee jeh. As er fud ny h-obbyr va’n feiyral gaase.

Fy yerrey, vrish y dorrys. By vaghtal eh dy cheayll adsyn çheumooie lheid y tharmane. Daase y cronkal dys bwoalley raghtal, as eisht va sheean baggyrtagh ogheryn ry-chlashtyn ayns dorryssyn halley ny shamyryn faggys dou. Roie mee trooid y barney noa, as boltal y dorrys halley roish my dod ad çhyndaa yn ogher. Eer rish shen cheayll mee ad prowal dorrys halley y treeoo hamyr—ish as uinnag eck lhiggagh dou roshtyn y mullagh foee—lesh ogher ylghlaish.

Yn Scaa Harrish Innsmouth: Thie Ghilman

S’doillee dou cur ennym er yn ennaghtyn v’orrym rish y chooish ghroamagh shen. Cooish cheoie, cooish voght; arraghtagh, atçhimagh. Va skeeal y yilley groseyragh er my aarlaghey son lheid y taghyrt, agh ‘syn ‘eill hene v’eh boiragh anveaghee quaagh. She skeeal lhiannooagh v’ayn gyn ourys, agh va jeeanid as atçhim keoie shenn Zadok er chur anvea orrym. Nish v’eh geyraghey as covestey marish yn ‘eoh v’aym er-dyn toshiaght er y valley shoh as y scaa shaghnagh mollaghtagh er.

Veign creearey y skeeal reesht ny s’anmey, foddee, as feddyn aynsyn cree cochaslys shenndeeagh ennagh; cha baillym nish agh gyn smooinaghtyn er. V’eh çheet dy ve anmagh gaueagh —va’n ooreyder aym taishbyney 7:15, as va’n barroose cour Arkham faagail Kerrin y Valley ec hoght—myr shen ren mee eab dy reaghey my smooinaghtyn, shirrey aigney kiune as jeantagh. Hooill mee dy tappee trooid straiddyn follym, shaghey mullee scartey as thieyn tuittym, cour y thie oast raad va mee er dashtey y valeese, as raad yioin y barroose.

Yn Scaa Harrish Innsmouth: Sker y Jouyll

Hug mee y boteil da Zadok, as slug eh y bine jerrinagh jeh. By whaagh eh nagh row y jough ry-akin er; cha cheayll mee blass plooghit hene ‘sy choraa ard pheeaghanagh. Shliee eh mwannal y boteil as tuittym eh ‘sy phoagey echey, as eisht ghow eh toshiaght snoggal as loayrt myr sannish meen. Chroym mee rish dy eaishtagh son fockle so-hoiggal erbee. Er lhiam dy row mongey sharroo ry-akin ergooyl yn ‘aasaag hallagh skeabagh. V’eh loayrt dy jarroo, as va’n chooid smoo jeh ry-chlashtyn aym.

“Matt boght—v’eh dy kinjagh n’oi—jannoo eab dy haglym feallee marish, as loayrt dy liauyr rish ny sharmanee—gyn bree—raoie ad y saggyrt Cohionnalagh ass y valley er çhea, as scuirr y fer Saasilagh jeh—cha vaik mee rieau y saggyrt Bashtagh Resolved Babcock reesht. Farg Yahvey!—mish my eean aeg dy liooar, agh cheayll mee ny cheayll mee, honnick mee ny honnick mee— Dagon as Ashtoreth—Belial as Beëlzebub—Lheiy Grainnit as jee-jallooyn Chanaan as ny Philistinee—feodyssyn Vabylon—Mene, mene, tekel, upharsin—”

Scuirr eh reesht, as rere y jeeagh ‘sy tooill fluigh gorrym va aggle orrym dy tuittagh eh my-neealloo. Agh tra hug mee laue meein er e yeaylin, hyndaa eh orrym dy tappee thanvaneagh as deayrtey magh raa quaagh elley.

Recortys jeh Cleiy Picadilly

Ren mee recortys jeh Cleiy Picadilly. T'eh ry-chlashtyn ayns shoh: Archive.org

Cleiy Picadilly

Cleiy Picadilly

As mish goll sheese Picadilly laa dy row as roshtyn Grosvenor Place, my s'beayn my chooinaghtyn, honnick mee kuse dy 'ir obbree - wahll, er lhiam. Va speiyghyn ayns nyn laueyn, as cheau ad troosyn coyrd y ree, as cribbylyn liareagh - adsyn ta sleih cur "York-to-London" as lheid ny h'enym quaagh orroo er fa ennagh.

Er lhiam dy row ad gobbbraghey lane jeean, derrey scuirr mee as briaght jeh fer jeu cre'n obbyr v'ocsyn.

"Ta shin cleiy Picadilly," as eshyn.

"Agh, yn imbagh shoh?" deysht me. "Vel shen cadjin ayns Mean Souree?"

"Cha nel shin ny t'ou credjal," as eh.

"Oh, ta mee toigal," as mish, "she spotçh t'ayn myr t'eh."

"Wahll, cha nee dy jarroo," denee eh.

"Gioal, myr shen?" as mish.

"Cha nee noadyr," as eshyn.

As eisht yeeagh mee er y voayl va speiht oc hannah, as ga dy nee glenhollys v'ayn er-my-skyn, honnick mee dorraghys heese, lane dy rollageyn y Jiass.

"V'eh feiyragh as olk, as t'eh er chur skeeys orrin," dooyrt eshyn as ny troosyn coyrd y ree echey. "Cha nel shin ny t'ou credjal."

V'ad cleiy Picadilly dy bollagh.

---

Taking Up Picadilly

Going down Picadilly one day and nearing Grosvenor Place I saw, if my memory is not at fault, some workmen with their coats off—or so they seemed. They had pickaxes in their hands and wore corduroy trousers and that little leather band below the knee that goes by the astonishing name of "York-to-London."

They seemed to be working with peculiar vehemence, so that I stopped and asked one what they were doing.

"We are taking up Picadilly," he said to me.

"But at this time of year?" I said. "Is it usual in June?"

"We are not what we seem," said he.

"Oh, I see," I said, "you are doing it for a joke."

"Well, not exactly that," he answered me.

"For a bet?" I said.

"Not precisely," said he.

And then I looked at the bit that they had already picked, and though it was broad daylight over my head it was darkness down there, all full of the southern stars.

"It was noisy and bad and we grew aweary of it," said he that wore corduroy trousers. "We are not what we appear."

They were taking up Picadilly altogether.

---

Ta'n skeealeen shoh çhyndaait ass Taking Up Picadilly liorish yn Çhiarn Dunsany. Ta'n lioar vunneydagh ry-lhaih er Project Gutenberg.

Yn Scaa Harrish Innsmouth: Captan Obed

“Shid raad ghow eh toshiack—yn ynnyd ooilley ard-olkys shid rish yn ushtey dowin. She giat niurin t’awn—lhargagh eaynagh ta raoie sheese derrey nagh nod rimlagh sunteil erbee feddyn grunt. By Henn Chaptan Obed ren eh—eshyn dynsee ny smoo na lhisagh eh mastey Ellanyn ny Mooir Yiass.

“She drogh-stayd v’awn ny laghyn shid. Dellal leodaghey, mwyljyn falleil—as ny fir noa myrgeddin. Hooar cooid hare ny deiney baase myr roosteyryn marrey rish Caggey 1812, ny baiht marish brig Elizy, ny snaw-brig Ranger—baatyn Ghilman, fys ayd. Va tree baatyn ec Obed Marsh—brigantine Columba, brig Hetty, as barc Sumatra Queen. Eshyn ynrican va fowst dellal awns ny h-Injyn Shiar as y Cheayn Sheealtagh, ga dy ren Esdras Martin ventreil awns hock-as-feed lesh y Malay Pride.

“Cha row rieau lheid Chaptan Obed awn—shenn laue y Jouyll v’awn! Heh, heh. S’cooin lhiam foast eshyn loayrt er buill yoarree, as gra dy row y sleih ommidjagh son cummal seose y çhaglym Creestee, as surranse errey dy meein imlagh. Er lesh, bare daue shirrey jeeghyn share, gollrish pobble ny h-Injyn—jeeghyn verragh eeastagh mie daue er son oural, as freggyrtyn loaghtagh da padjeryn.

Baase Phan

Tra rosh ny turryssee Lunninagh Arcady, ren ad dobberan, yn derrey yeh gys y jeh elley, mychione baase Phan. As drasteyn honnick ad eshyn, ny lhie stark as taaue. Cha darree Pan ny h-Eairkyn, as va'n fynney echey fo druight; cha row cummey baagh bio er. As eisht dooyrt ad, "S'feer eh dy vel Pan marroo."

As, nyn shassoo dooagh rish y chorp foawragh ny lhie, yeeagh ad rish foddey dy hraa ec Pan imraagh.

As haink fastyr, as haink rish rollage beg.

As ny sheyn, ass claghan glion Arcadagh ennagh, haink doodeeyn Arcadagh as adsyn goaill arrane eddrym.

As tra yeeagh ad ersyn, er y çhenn Jee ny lhie 'sy cheeiraght, scuirr ad as loayrt rish y cheilley myr sannish. "Nagh ommidjagh y cummey t'er," as ad, as gearey dy feagh lesh shen.

As rish sheean gearey, ren Pan lheimmey seose, as va'n garvel skeaylt ec e chrubbyn.

As choud cheddin as hannee ny turrysee nyn shassoo as eaishtagh rish, va sheeanyn eiyrtys gennal aavuilley jeh carrickyn as mullee Arcady.

---

Ta'n skeealeen shoh çhyndaait ass The Death of Pan liorish yn Çhiarn Dunsany. Ta'n lioar vunneydagh ry-lhaih er Project Gutenberg.

Ny Tree Mec Vooarey

As fy-yerrey hrog Deiney er ard gloyr s'jerree ard-veenid, troggal smoo ny caayrey yerrinagh.

Ayns duinid thallooin foddey foue, ren jeshaghtyn cronnane rish cooilleeney dagh ooilley feme v'oc; cha row laboraght erbee ry-yannoo ec Deiney. Ghow ad aash nyn soie, as coloayrt er yn 'Eysht Keintys.

As nish as reesht, ass magheryn jarroodit, haink shenn ven voght as shirrey jeirk. Haink ee dy doccaragh dys y dorrys sodjey magh, dys arragh sodjey ghloyr yerrinagh Gheiney. As dagh cheayrt hug ad cooyl ee. Cha row y chaayr shoh, ard-obbyr Gheiney, cooie jee.

She Najoor haink shirrey jeirk ass my magheryn, as hug ad cooyl ee dagh keayrt.

As ersooyl lhee reesht dys ny magheryn.

As laa dy row haink ee reesht, as reesht ren ad dy jiooley. Agh haink tree mec vooarey mâree.

"Hie stiagh adsyn," as ish. "Adsyn my vec, stiagh 'sy chaayr eu."

As hie stiagh ny tree mec vooarey.

As shoh mec Najoor, cloan agglagh y ven hreigit: Caggey, Genney as Plaih.

Dy jarroo, hie ad stiagh as feddyn Deiney gyn yss 'sy chaayr oc; foast smooinaghtyn er ny Feyshtyn oc, lhiantyn hug yn ard-veenid oc, gyn eer clashtyn rish y cheimnaghey as ad nyn dree tayrn faggys daue.

---

Ta'n skeealeen shoh çhyndaait ass The Three Tall Sons liorish yn Çhiarn Dunsany. Ta'n lioar vunneydagh ry-lhaih er Project Gutenberg.

Yn Scaa Harrish Innsmouth: cleayney Zadok Allen

Shegin da teaym roonagh ennagh—ny cleayn sharroo er bun dorraghey follit—er chur orrym caghlaa yn aigney v’orrym. Va mee er giarail rish foddey nagh derrin geill agh da seyrnaght hene, as ec y traa shid hene va mee jannoo siyr cour Kerrin y Valley myr eab dy hirrey arraghey leah ass y valley yngyragh baaish as loau. Aght ennagh, tra honnick mee shenn Zadok Allen, haink rish strooanyn noa ‘syn aigney aym, as ren mee feiyal as mish neuhickyr.

Va’n aeglan er my hickyraghey nagh niarragh y shenn dooinney agh sannishyn keoie brisht er skeealyn erskyn credjue sheelt. Harrish shen, v’eh er chur raaue dou nagh beagh eh sauçhey loayrt rish dy vaikagh ynnydee erbee shen. Ny yei shen, va’n shenn ‘eanishagh jeh fioghey y valley ny violagh nagh dod mee shassoo n’oi. Va’n cooinaghtyn echey roshtyn erash dys eashyn lhongyn as thieyn-obbree; son nagh vel beeal-arrish whaagh cheoie dy mennick ny cochaslys chowreydagh er bun cree firrinagh? Shegin da’n shenn ‘er er vakin dagh ooilley chooish Innsmouth rish jeih bleeaney as kiare feed. Ghooisht accrys scoillaragh aynym ny stroshey na keeal as arrey; as corvian aegid orrym, heill mee dy noddin creearey cree shennaghys hene ass y deayrtey breagagh fud-y-cheilley darragh jeh, gyn ourys, fo greim jough lajer.

Y Scaa Harrish Innsmouth: Y Turrys

Jalloo ass Pixabay rere kied

As myr shen ghow mee toshiaght er turrys oardreilagh, agh lieh fud-y-cheilley, trooid cassanyn keylley dorraghey Innsmouth. Hie mee shaghey y droghad as çhyndaa cour buirroogh ny h-easyn s’inshley; hooill mee faggys da thie-sheelee Varsh, as er lhiam dy row eh quaagh nagh geayll mee feiyr keirdey jeh. Va’n thie shen ny hassoo er eaynin awiney kiontoyrtagh, faggys da droghad as cohionnal straiddey. Er lhiam dy nee yn ynnyd baljagh s’leaie v’ayn, roish my daink Kerrin y Valley noa ‘syn ynnyd oc erreish da’n Irree Magh.

Haink mee tessen y chlash reesht er droghad Main Street, as feddyn slyst treigeilys lhome hug mee er creau aght ennagh. Va mollyn tuittymagh dy vullee Ollanagh er nyannoo fannys aggagh quaagh, as dirree speek gowlagh shenn agglish nyn gooyl, as y kione giarrit jee. Va tannys ec thie ny ghaa ayns Main Street, dy baghtal, agh va’n chooid smoo jeu fo ghlass as buird. Cur shilley shaghnagh sheese fo-raaidjyn gyn pemmad, honnick mee uinniagyn dooey follym ny bwaaneyn treigit. List ymmodee jeu er uillin chryggylagh anchredjuagh, erreish da ny bunnyn oc goll fo ayns shoh ny ayns shid. Vlak ny h-uinniagyn orrym gollrish sooillyn scaanagh, as v’eh orrym goaill cree roish my dod mee çhyndaa my hiar cour yn clyst. Dy jarroo, ta scoagh thie treigit mooadaghey ‘syn aght towse-oaylleeagh, cha nel ‘syn aght earrooagh, raad ta ny thieyn co-chruinnaghey nyn gaair ‘ollym-faase lhome. Jeeaghyn er astyllyn marroo-hooillagh gyn jerrey; smooinaghtyn er shamyryn ass towse co-chianglt myr anvaaraght ghorraghey ghroamey, lane sneeuaneyn as cooinaghtyn as y veishteig varriaghtagh — t’eh dooshtey aggleyn as feohyn lorgagh nagh dod y fallsoonys s’fondagh ad y vooghey. Va Fish Street wheesh treigit as Main, agh va ymmodee thieyn stoyrey breekey as cloaie aynjee v’ayns stayd braew foast. Va Water Street ny mac-straid eck, bunnys, agh dy row doarlishyn mooarey aynjee rish y cheayn raad va ny keiyghyn traa dy row. Cha vaik mee nhee bio erbee, agh ny h-eeasteyryn skeaylt er y voalley marroo foddey jeem, chamoo geayll mee sheean erbee agh freayney ny tidey phuirt, as buirroogh easyn ny Manuxet. Va’n balley boirey orrym ny s’trimmey as ny s’trimmey foast, as yeeagh mee my yei dy sleetçhagh rish teiy my raad erash harrish droghad corragh Water Street. Rere y jalloo, va droghad Fish Street lane vrisht.

Y Dhiane as yn Ainle

Rish snaue magh ass oaieghyn ny merriu, haink dhiane quaiyl ainle. As yeeagh y jees ry-cheilley er reeghyn as reeriaghtyn, as aeganyn as caillinyn as caayryn deiney. Honnick ad shenn deiney trome ayns ny caairyn oc, as clashtyn paitçhyn goaill arrane 'sy vagher. Honnick ad caggaghyn foddey as fir chaggee as baljyn boallit, creenaght as olkys, as moyrn reeghyn, as deiney dagh ooilley çheer by enney ec soilshey ny greiney orroo.

As loayr y dhiane rish yn ainle: "Cur my ner y bee aym."

"Be dakeon para Thina poluphloisboio Thalassaes," as yn ainle dy injil, son hooill ad rish y cheayn, "as nod oo shen y chur fo haart myrgeddin?"

As fo jiarg-chorree haink glassaght atçhimagh er y dhiane, son rish tree thousane bleeaney v'eh er nyannoo eab y linney shen y scryssey as va'n carr foast gaaheeaney ayns e chione.

---

Shoh heese y teks Greagish bunneydagh, ass yn Iliad 1:34

ὣς ἔφατ᾽, ἔδεισεν δ᾽ ὃ γέρων καὶ ἐπείθετο μύθῳ:
βῆ δ᾽ ἀκέων παρὰ θῖνα πολυφλοίσβοιο θαλάσσης:

hṑs éphat᾽, édeisen d᾽hò gérōn kaì epeítheto mýthōi:
bē̂ d᾽akéōn parà thîna polyphloísboio thalássēs:

Loayr eh, as haink aggle er y shenn dooinney as ghow eh rish e ghoo:
Hooill eshyn ny host rish buirrooghey ny marrey:

---

Ta'n skeealeen shoh çhyndaait ass The Worm and the Angel liorish yn Çhiarn Dunsany. Ta'n lioar vunneydagh ry-lhaih er Project Gutenberg.

Coontey Randolph Carter

Coontey Randolph Carter

Ta mee ginsh diu reesht, gheiney ooasle; cha neeu erbee eh mish y cheishtey. Pryssoonee mee ayns shoh er son dy bragh my sailliu; jean my ghooney stiagh ny my chur gys baase my ta feme oc er surransagh dys cummal seose y chonrieught ta shiu genmys cairys; cha noddym gra ny smoo ny ny ta grait aym hannah. Dagh ooilley red s'cooin lhiam eh, ta mee er ny ghra dy jeeragh. Cha nel red erbee jeh cassit ny follit aym, as my ta'n chooish neuchruinn foast, shen er coontey ynrican y vodjal dorraghey t'er jeet harrish my aigney - y bodjal shen as dooghys kayeeagh ny scoaghyn hug eh orrym.

Jirrym reesht, cha s'aym cre'n erree haink er Harley Warren, agh er lhiam - s'treisht lhiam, faggys - dy vel eh ec fea er neunhee nish, my ta lheid y stayd sheeant ayn raad erbee. S'feer eh dy vel mee e charrey s'ainjyssee rish queig bleeantyn, as lieh-ayrniagh 'syn aahirrey agglagh jeant echey er cooishyn gyn enney. Cha nee'm jiooldey, ga dy vel my chooinaghtyn neuhickyr as neuchronnal, dy vaik feanishagh ennagh eu y jees ain ec lieh-oor lurg nane-jeig yn oie agglagh shen, as shinyn shooyll ry-cheilley er raad keesh Ghainsville rish Curragh Chuphar Vooar. Shickyreeym dy arryltagh dy dymmyrk shin londeyryn lectragh, kiebbyn, as streng chaslit whaagh as jeshaghtyn kianglt ree; va laue ocsyn ooilley 'sy çhilley owanagh ynrican t'er ny 'owanaghey er my chooinaghtyn jeeillit. Agh er ny haghyr ny yei, as er y fa hooar ad mish my lomarcan as thollaneagh ec oirr ny curree y nah voghrey, shegin dou gra nagh cooin lhiam red erbee agh ny ta mee er n'insh diu reesht as reeshtagh. Dinsh shiu dou nagh vel boayl erbee 'sy churragh ny'n ard oddagh ve ynnyd ny taghyrtyn atçhimagh shen. Ta mee freggyrt nagh vel fys aym agh er ny honnick mee. Foddee dy nee ashlish ny tromlhie v'ayn - s'mian jeean lhiam dy nee ashlish ny tromlhie v'ayn - agh shen ooilley s'cooin lhiam eh jeh taghyrtyn atçhimagh ny h-ooryn erreish dooin faagail tastey deiney. As er y fa nagh daink Harley Warren erash, eshyn ny'n scaa echey - ny nhee ennagh gyn enney nagh noddym soilshaghey magh - cha hoilshee agh y traa shen.

Myr dooyrt mee, va mee ainjyssagh rish studeyrys quaagh Harley Warren, as ghow mee ayrn ayn ny keayrtyn. Mastey'n çhaglym ass towse echey dy lioaryn joarree goaney er cooishyn neulhiggit, ta mee er lhiah dagh fer ta screeut ayns çhengey t'aym; agh t'adsyn beg cosoylit roosyn t'ayns çhengaghyn nagh noddym toiggal. Ta'n chooid smoo jeu ayns Arabish, ta mee credjal; as y lioar jouyll-screeut hayrn y jerrey orrin - lioar hug lesh eh 'sy phoagey echey magh ass y teihll - v'eshyn screeut ayns lettyryn nagh vaik mee rieau y lheid oc. Cha row Warren arryltagh rieau dy insh dou ny v'aynsyn, dy jeeragh. As bentyn rish y studeyrys jeant ain - nhegin dou gra reesht nagh gooin lhiam y clane foast? Er lhiam dy nee myghin t'ayn; she studeyrys agglagh v'ayn, as lhian mee roo kyndagh rish cleaynaghey neuarryltagh, cha nel rish mian hene. Va kioneys ec Warren orrym rieau, as va aggle orrym roish ny keayrtyn. S'cooin lhiam yn aght va mee er craa yn oie roish ny taghyrtyn agglagh, as eshyn loayrt gyn scuirr erbee er y çheiltynys echey, er y fa nagh vel merriu ennagh loauaghey arragh, agh marraghtyn dy fondagh as roayr ayns ny tommanyn oc rish milley bleeaney. Agh cha nel aggle aym roish nish; er lhiam dy vel enney echey nish er scoaghaghyn ass my oayllys. Nish ta aggle aym er-e-hon.

Ta mee ginsh diu reesht nagh vel fys baghtal aym er y dean v'ain yn oie shen. Son shickyrys, v'eh bentyn rish red ennagh 'sy lioar hrog Warren eh - y shenn lioar ayns lettyryn do-lhiah v'er ny roshtyn ass yn Injey mee er dy henney - agh breearreeym nagh row fys aym er ny v'eh jerkal feddyn eh. Ta'n feanishagh eu gra dy vaik eh shin mysh lieh-oor lurg nane-jeig er raad keesh Ghainsville, shooyll cour Curragh Chuphar Vooar. S'feer eh, s'cosoylagh, agh cha gooin lhiam eh dy baghtal. Cha nel agh un çhilley grainnit er my annym, as shegin dasyn ve foddey lurg mean oie; va eayst eairkagh vaarnee ny soie ard ayns ny niaughyn gaalagh.

She shenn ruillick v'ayn; ruillick cho shenn va mee er craa lesh ymmodee cowraghyn bleeantyn ass towse. V'ee ny soie ayns laggan dowin tash, fo lane-choodagh faiyr rank, keynnagh, as sarkil snauee whaagh, as er ny feie haink soar neuchronnal dou chianglee my aigney meecheayllagh rish claghyn molkagh. Er gagh çheu va cowraghyn neuyeadid as drogh-oardrailys ry-akin, as haink eie lhiantynagh orrym dy nee Warren as mish ny kied chretooryn vioey haink stiagh er tostid marrooagh ny h-eashyn. Vlak eayst eairkagh vaarnee hreih harrish oirr y ghlion trooid gaal nieunagh dirree ass oaighyn gyn enney, er lhiam. Fo skaggyn moaley kirkinagh e soilshey dod mee cronnaghey straih graynoil dy leacyn oaie, crockyn, lhiaghtyn cooinaght as eddinyn toman mooar; v'ad ooilley boghlanagh, coodit lesh keynnagh, daahit liorish tashtid, as lieh-'ollit liorish rankid arraghtagh ny glasseraght neufollan.

Y chied chooinaght vaghtal aym jinyn 'sy ruillick agglagh shen, shen Warren as mish scuirr roish lhiaght lieh-naardit er lheh, as lhiggey da laad ennagh va shin er n'ymmyrkey tuittym sheese. Hug mee my ner nish dy row londeyr lectragh as daa chiebbey ayms, choud's va londeyr cosoylagh rish ec my charrey, as farrys çhellvane ymmyrkagh. Cha loayr shin fockle erbee; v'eh jeeaghyn dy row ynnyd as obbyr mie er fys ain daa, as gyn feiyal ghow shin kiebbey y pheesh as goaill toshiaght scughey faiyr, sarkil as thalloo chailjey jeh thie rea shenn-emshiragh ny merriu. Erreish dooin seyrey y lane eaghtyr, as eshyn jeant jeh tree claghyn tryal fouwragh, hayrn shin erash dys goaill towshan jeh'n reayrtys baaish. Er lhiam dy ren Warren co-earroo inçhynagh ennagh. Eisht hooill eh erash da'n oaie, as jannoo eab dy phrisal seose y leac va s'faggys da tholtanagh cloaie va ny lhiaght cooinaghtyn 'sy laa, foddee. Cha daink eh lesh, as chowree eh er son cooney. Fy yerrey, ren y lane niart ain feaysley y leac, as hrog shin eh as seiy eh ass y raad.

Ren arraghey y leac taishbyney barney doo, as gheayrt magh smoghan dy ghas miasmagh cho feodagh lheim shin erash fo grayn. Agh rish tammylt, hayrn shin faggys da'n slogh reesht, as dennee shin dy row y soar ny sloo do-hurranse. Hoilshee ny londeyryn kione roie greeishyn, as ingyr dwoaieagh ennagh y thalloo sthie sheeley harroo, as boallaghyn tash fo scroig neetar ny çhemmalyn oc. As nish son y chied cheayrt ta taggloo beill cooinit aym; Warren loayr rhym er liurid 'sy choraa tennoragh menoyragh echey, as eshyn neuvoirit dy quaagh liorish y çhymbyllaght agglagh mygeayrt-y-mooin.

"S'treih lhiam shassoo ort fuirraghtyn er y thalloo," as eh, "agh by pheccah eh lhiggey da fer cho lhaggey e nearagyn goll sheese ayns shen. Cha nod oo sheiltyn, gyn scansh da ny t'ou er lhiah as ny ta mee er ninsh dhyt, ny vees orrym fakin as jannoo eh. She obbyr jouyllagh t'ayn, Charter, as ta ourys aym dy noddagh fer erbee gyn daanys yiarn ny hurranse as tannaghtyn bio as er e cheayll. Cha mian lhiam frioggan ort, as ta fys ec Jee by voggey dou dty heshaght; agh ta currym orrym, aght ennagh, as cha noddym tayrn lheid y fer nearagagh sheese marym dys baase ny baanrys cosoylagh. Ta mee ginsh dhyt, cha nod oo sheiltyn rieughid y nhee! Agh ta mee gialdyn dy hoilshaghey dagh kesmad y turrys dhyt er y çhellvane - jeeagh, ta streng dy liooar aym dys roshtyn cree ny cruinney as erash!"

Ta ny focklyn shen as e choraa chiune ry-chlashtyn aym foast, as s'cooin lhiam ny çhionnraaghyn hug mee er. By vian jeean dou goll marish my charrey stiagh 'sy çharvaal ghrouw, er lhiam, agh v'eh kione-lajeragh as creoi. Keayrt ennagh vaggyr eh dy 'aagail y jurnaa dy danneein shassooagh; haink y baggyrt shen lesh, er y fa nagh row feaysley y chooish agh echeysyn. S'cooin lhiam ooilley shen, ga nagh gooin lhiam nish cre'n nhee hirr shin. Erreish da cur orrym lhie roish y chiarail echey, hrog Warren y rollian streng as cochiartaghey ny jeshaghtyn. As eshyn snoggal, ghow mee fer jeu as soie sheese er shenn leac oaie daahit ec ny h-eashyn, faggys da'n doarlish noa-feddynit. Eisht chrie ad my laue, as cur y rollian streng er e gheaylin, as skellal stiagh 'sy thie craueyn do-insh.

Rish tammylt, dreill mee shilley er soilshey y losteyr, as va moostrey streng ry-chlashtyn tra hug eh eh sheese ny yei; agh dy gerrid, herree y soilshey dy doaltattym, myr dy row eh er gassey corneil ennagh 'sy roie greeishyn cloaie, as lheie magh y sheean myrgeddin. Va mee my lomarcan, agh er my chiangley da'n diunid gyn enney ec snaieyn obbeeys jeen lhie geayney fo skaggyn moaley ny h-eayst eairkagh vaarnee.

Ayns tostid fadaneagh ard-valley lheeah as treigit ny merriu, ren my inçhyn gientyn scaanyn as conrieughtyn scoaghagh ass towse; as er lhiam dy daink persoonid graney er ny çhiambleyn as leacyn arraghtagh - far-enney ennagh. Va scaanyn gyn cummey lhie cooyl chlea ayns cuilleigyn s'dorree y lhaggan sarkyllagh, er lhiam, as gimman myr cosheeaght drogh-chliaghtagh vollaghtagh shaghey beill ny tommanyn molmagh 'sy lhargagh; scaanyn nagh dod ve ceaut ec yn eayst eairkagh vlakee, treih.

Cheau mee shillaghyn kinjagh er my ooreyder lesh soilshey y losteyr lectragh, as eaishtagh rish y ghlackeyder çhellvane as imnea jeean orrym; agh rish kerroo oor as ny smoo, cha geayll mee veg. Eisht haink criggaraght beg ass y jeshaght, as deam mee sheese da my charrey lesh coraa toghtit. Ga dy row mee twoaieagh, cha row mee aarloo da ny focklyn cheayll mee girree neese magh ass yn ooig neuheiltagh, as y blass orroo scoaghit as er creau erskyn focklyn erbee cheayll mee rieau jeh Harley Warren. Eshyn v'er my 'aagail cho kiune tammylt beg er-dy-henney, v'eh gyllagh neese ayns sannish craagh ny smoo drogh-vonneydagh na screeagh er ard.

"Yee! Dy vaikagh oo ny ta mee fakin!"

Cha dod mee freggyrt. Gyn choraa, cha dod mee agh fuirraghtyn. Loayr y coraa toghtit reesht:

"Charter, t'eh agglagh - eajee - neuchredjallagh!"

Y cheayrt shoh cha huitt my choraa, as gheayrt mee thooilley feyshtyn greesit stiagh 'sy ghlackeyder. As aggle ass towse orrym, dooyrt mee gyn scuirr, "Warren, c'red t'eh? C'red t'eh?"

Haink coraa my charrey reesht, peeaghaneagh lesh aggle, as blass drogh-hreihys er nish.

"Cha noddym ginsh dhyt, Charter! T'eh ass smooinaght dy bollagh - cha lhoys dou gra - cha nod fer erbee tannaghtyn bio as fys echey er - Yee ooilley-niartal! Cha heill mee rieau y lheid!"

Tostid reesht, er lhimmey jeh'n stroo meeresoonagh dy 'eyshtyn gheayrt mee magh er creau. Eisht coraa Warren as ardjey ard-yindys keoie er:

"Charter! Son graih Yee, cur y leac erash as magh ass shoh my foddee uss! Tappee! - Faag y clane as immee çheumooie - shen y caa ynrican dhyt! Jean ny dooyrt mee, as ny shirr baght er orrym!

Cheayll mee, agh cha dod mee agh aaloayrt ny feyshtyn dy baanrit. Va tommanyn as dorraghys as scaanyn mygeayrt aym; as foym va cryggyl erskyn creeagh sheiltynys deiney. Agh va my charrey ayns gaue ny strimmey na mish, as trooid yn aggle va corree ennagh orrym dy chred eh dy noddin treigeil eh rish lheid y tuittymys. Tooilley criggaraght, as farkaght, as eisht yllagh treih ass Warren.

"Fow royd! Son graih Yee, cur y leac erash as trog er, Charter!"

B'vaghtal eh dy row my chumraag lhottit, as ren blass ennagh 'sy raa guilleydagh feaysley my ablid greimmit. Ren as dyllee mee kiarail, "Warren, gow cree! Ta mee çheet sheese!" Agh rish y çhebbal chaghlaa blass my choloayrtagh da yllagh lane veehreishteil:

"Ny jig! Cha nel oo toiggal! T'eh ro-anmagh - as s'lhiams y varranys. Cur y leac erash as roie - cha nel freggyrt erbee ayds ny ec peiagh erbee nish!"

Chaghlaa y coraa reesht, as haink blass kiune er nish, myr surranse gyn doghys. Agh va çhennid imnea er foast er my hon.

"Tappee - roish my vel eh ro-anmagh!"

Ren mee eab gyn cur geill da; dys brishey trooid y neuheiltys voogh mee, as cooilleeiney my vreearrey dy ratçh dy chooney eh. Agh hooar y nah hannish mish foast neughleashagh ayns driaghtyn jiarg-scoagh.

"Charter - jean siyr! Cha nel ymmyd erbee - shegin dhyt goll - ny share un na daa - y leac-"

Scuirr, ny smoo criggaraght, as coraa faase Warren:

"Faggys jeant nish - ny jean eh ny s'creoi - coodee ny greeishyn mollaghtagh as roie er son dty vea - t'ou uss coayl traa - bannaght lhiat, Charter - cha vaikym uss reesht."

As myr shen vooadee sannish Warren dys yllagh; yllagh dirree dy moal dys screeagh lughtit lesh lane ghrayn ny h-eashyn:

"Mollaght er ny nheeghyn iurinagh - çhionnalyn jeu - Graih Yee! Trog er! Trog er! TROG ER!"

As ny yei shen, tostid. Cha s'aym cre wooad dy h-eashyn gyn jerrey hannee mee my hoie as mish thollaneagh; sansheraght, mungley, gyllaghey, screeaghey stiagh 'sy çhellvane. Reesht as reeshtagh car ny h-eashyn shen hanshee mee, as vungil, as dyllee, as deam, "Warren! Warren! Loayr rhym - vel oo ayns shen?"

As eisht haink orrym yn ard-scoagh - y red do-chredjal, do-smooinaghtagh; do-insh, faggys. Ta mee er ngra dy jagh eashyn shaghey erreish da Warren screeaghey magh y raaue meehreishteilagh s'jerree, as nagh vrish agh my focklyn hene y tostid atçhimagh nish. Agh lurg tammylt cheayll mee criggaraght reesht 'sy ghlackeyder, as heeyn mee my chleayshyn da. Dyllee mee sheese reesht, "Warren, vel oo ayns shen?" as myr freggyrt cheayll mee ny t'er cheau y dolley shoh er my inçhyn. Cha nee'm eab, my gheiney seyrey, soilshey y cheau er y chooish - y coraa shen - as cha noddym cur coontey myn jeh noadyr; ren ny kied 'ocklyn raipey ersooyl my enney as faagail folmid cooinaghtyn derrey ghooisht mee 'sy thie lheihys. Lhisin gra dy row eh trome; mooghit; gleiynagh; feayr; neuheihllt; neughooinoil; neuchorpoil? C'red noddym gra? By jerrey my chooinaghtyn eh, as she jerrey my skeeal t'ayn. Cheayll mee eh, as coayl enney - cheayll mee eh as mish lhejit my hoie 'sy ruillick gyn enney 'sy laggan, mastey claghyn as tommanyn boghlanagh, as glasseraght rank, as gaal miasmagh - cheayll mee eh brooightey neese ass brein s'diuney ny h-oiae 'oshlit imshee shen tra ghaunse scaadooghyn merriu-eeagh gyn cummey fo eayst vollaghtagh vaarnee.

As shoh ny dooyrt eh:

"VOLVANE, TA WARREN MARROO!"

---

The Statement of Randolph Carter

I repeat to you, gentlemen, that your inquisition is fruitless. Detain me here forever if you will; confine or execute me if you must have a victim to propitiate the illusion you call justice; but I can say no more than I have said already. Everything that I can remember, I have told with perfect candour. Nothing has been distorted or concealed, and if anything remains vague, it is only because of the dark cloud which has come over my mind—that cloud and the nebulous nature of the horrors which brought it upon me.

Again I say, I do not know what has become of Harley Warren; though I think—almost hope—that he is in peaceful oblivion, if there be anywhere so blessed a thing. It is true that I have for five years been his closest friend, and a partial sharer of his terrible researches into the unknown. I will not deny, though my memory is uncertain and indistinct, that this witness of yours may have seen us together as he says, on the Gainesville pike, walking toward Big Cypress Swamp, at half past eleven on that awful night. That we bore electric lanterns, spades, and a curious coil of wire with attached instruments, I will even affirm; for these things all played a part in the single hideous scene which remains burned into my shaken recollection. But of what followed, and of the reason I was found alone and dazed on the edge of the swamp next morning, I must insist that I know nothing save what I have told you over and over again. You say to me that there is nothing in the swamp or near it which could form the setting of that frightful episode. I reply that I know nothing beyond what I saw. Vision or nightmare it may have been—vision or nightmare I fervently hope it was—yet it is all that my mind retains of what took place in those shocking hours after we left the sight of men. And why Harley Warren did not return, he or his shade—or some nameless thing I cannot describe—alone can tell.

As I have said before, the weird studies of Harley Warren were well known to me, and to some extent shared by me. Of his vast collection of strange, rare books on forbidden subjects I have read all that are written in the languages of which I am master; but these are few as compared with those in languages I cannot understand. Most, I believe, are in Arabic; and the fiend-inspired book which brought on the end—the book which he carried in his pocket out of the world—was written in characters whose like I never saw elsewhere. Warren would never tell me just what was in that book. As to the nature of our studies—must I say again that I no longer retain full comprehension? It seems to me rather merciful that I do not, for they were terrible studies, which I pursued more through reluctant fascination than through actual inclination. Warren always dominated me, and sometimes I feared him. I remember how I shuddered at his facial expression on the night before the awful happening, when he talked so incessantly of his theory, why certain corpses never decay, but rest firm and fat in their tombs for a thousand years. But I do not fear him now, for I suspect that he has known horrors beyond my ken. Now I fear for him.

Once more I say that I have no clear idea of our object on that night. Certainly, it had much to do with something in the book which Warren carried with him—that ancient book in undecipherable characters which had come to him from India a month before—but I swear I do not know what it was that we expected to find. Your witness says he saw us at half past eleven on the Gainesville pike, headed for Big Cypress Swamp. This is probably true, but I have no distinct memory of it. The picture seared into my soul is of one scene only, and the hour must have been long after midnight; for a waning crescent moon was high in the vaporous heavens.

The place was an ancient cemetery; so ancient that I trembled at the manifold signs of immemorial years. It was in a deep, damp hollow, overgrown with rank grass, moss, and curious creeping weeds, and filled with a vague stench which my idle fancy associated absurdly with rotting stone. On every hand were the signs of neglect and decrepitude, and I seemed haunted by the notion that Warren and I were the first living creatures to invade a lethal silence of centuries. Over the valley's rim a wan, waning crescent moon peered through the noisome vapours that seemed to emanate from unheard-of catacombs, and by its feeble, wavering beams I could distinguish a repellent array of antique slabs, urns, cenotaphs, and mausolean facades; all crumbling, moss-grown, and moisture-stained, and partly concealed by the gross luxuriance of the unhealthy vegetation. My first vivid impression of my own presence in this terrible necropolis concerns the act of pausing with Warren before a certain half-obliterated sepulchre, and of throwing down some burdens which we seemed to have been carrying. I now observed that I had with me an electric lantern and two spades, whilst my companion was supplied with a similar lantern and a portable telephone outfit. No word was uttered, for the spot and the task seemed known to us; and without delay we seized our spades and commenced to clear away the grass, weeds, and drifted earth from the flat, archaic mortuary. After uncovering the entire surface, which consisted of three immense granite slabs, we stepped back some distance to survey the charnel scene; and Warren appeared to make some mental calculations. Then he returned to the sepulchre, and using his spade as a lever, sought to pry up the slab lying nearest to a stony ruin which may have been a monument in its day. He did not succeed, and motioned to me to come to his assistance. Finally our combined strength loosened the stone, which we raised and tipped to one side.

The removal of the slab revealed a black aperture, from which rushed an effluence of miasmal gases so nauseous that we started back in horror. After an interval, however, we approached the pit again, and found the exhalations less unbearable. Our lanterns disclosed the top of a flight of stone steps, dripping with some detestable ichor of the inner earth, and bordered by moist walls encrusted with nitre. And now for the first time my memory records verbal discourse, Warren addressing me at length in his mellow tenor voice; a voice singularly unperturbed by our awesome surroundings.

"I'm sorry to have to ask you to stay on the surface," he said, "but it would be a crime to let anyone with your frail nerves go down there. You can't imagine, even from what you have read and from what I've told you, the things I shall have to see and do. It's fiendish work, Carter, and I doubt if any man without ironclad sensibilities could ever see it through and come up alive and sane. I don't wish to offend you, and heaven knows I'd be glad enough to have you with me; but the responsibility is in a certain sense mine, and I couldn't drag a bundle of nerves like you down to probable death or madness. I tell you, you can't imagine what the thing is really like! But I promise to keep you informed over the telephone of every move—you see I've enough wire here to reach to the centre of the earth and back!"

I can still hear, in memory, those coolly spoken words; and I can still remember my remonstrances. I seemed desperately anxious to accompany my friend into those sepulchral depths, yet he proved inflexibly obdurate. At one time he threatened to abandon the expedition if I remained insistent; a threat which proved effective, since he alone held the key to the thing. All this I can still remember, though I no longer know what manner of thing we sought. After he had secured my reluctant acquiescence in his design, Warren picked up the reel of wire and adjusted the instruments. At his nod I took one of the latter and seated myself upon an aged, discoloured gravestone close by the newly uncovered aperture. Then he shook my hand, shouldered the coil of wire, and disappeared within that indescribable ossuary. For a moment I kept sight of the glow of his lantern, and heard the rustle of the wire as he laid it down after him; but the glow soon disappeared abruptly, as if a turn in the stone staircase had been encountered, and the sound died away almost as quickly. I was alone, yet bound to the unknown depths by those magic strands whose insulated surface lay green beneath the struggling beams of that waning crescent moon.

In the lone silence of that hoary and deserted city of the dead, my mind conceived the most ghastly phantasies and illusions; and the grotesque shrines and monoliths seemed to assume a hideous personality—a half-sentience. Amorphous shadows seemed to lurk in the darker recesses of the weed-choked hollow and to flit as in some blasphemous ceremonial procession past the portals of the mouldering tombs in the hillside; shadows which could not have been cast by that pallid, peering crescent moon. I constantly consulted my watch by the light of my electric lantern, and listened with feverish anxiety at the receiver of the telephone; but for more than a quarter of an hour heard nothing. Then a faint clicking came from the instrument, and I called down to my friend in a tense voice. Apprehensive as I was, I was nevertheless unprepared for the words which came up from that uncanny vault in accents more alarmed and quivering than any I had heard before from Harley Warren. He who had so calmly left me a little while previously, now called from below in a shaky whisper more portentous than the loudest shriek:

"God! If you could see what I am seeing!"

I could not answer. Speechless, I could only wait. Then came the frenzied tones again:

"Carter, it's terrible—monstrous—unbelievable!"

This time my voice did not fail me, and I poured into the transmitter a flood of excited questions. Terrified, I continued to repeat, "Warren, what is it? What is it?"

Once more came the voice of my friend, still hoarse with fear, and now apparently tinged with despair:

"I can't tell you, Carter! It's too utterly beyond thought—I dare not tell you—no man could know it and live—Great God! I never dreamed of THIS!" Stillness again, save for my now incoherent torrent of shuddering inquiry. Then the voice of Warren in a pitch of wilder consternation:

"Carter! for the love of God, put back the slab and get out of this if you can! Quick!—leave everything else and make for the outside—it's your only chance! Do as I say, and don't ask me to explain!"

I heard, yet was able only to repeat my frantic questions. Around me were the tombs and the darkness and the shadows; below me, some peril beyond the radius of the human imagination. But my friend was in greater danger than I, and through my fear I felt a vague resentment that he should deem me capable of deserting him under such circumstances. More clicking, and after a pause a piteous cry from Warren:

"Beat it! For God's sake, put back the slab and beat it, Carter!"

Something in the boyish slang of my evidently stricken companion unleashed my faculties. I formed and shouted a resolution, "Warren, brace up! I'm coming down!" But at this offer the tone of my auditor changed to a scream of utter despair:

"Don't! You can't understand! It's too late—and my own fault. Put back the slab and run—there's nothing else you or anyone can do now!" The tone changed again, this time acquiring a softer quality, as of hopeless resignation. Yet it remained tense through anxiety for me.

"Quick—before it's too late!" I tried not to heed him; tried to break through the paralysis which held me, and to fulfil my vow to rush down to his aid. But his next whisper found me still held inert in the chains of stark horror.

"Carter—hurry! It's no use—you must go—better one than two—the slab—" A pause, more clicking, then the faint voice of Warren:

"Nearly over now—don't make it harder—cover up those damned steps and run for your life—you're losing time— So long, Carter—won't see you again." Here Warren's whisper swelled into a cry; a cry that gradually rose to a shriek fraught with all the horror of the ages—

"Curse these hellish things—legions— My God! Beat it! Beat it! Beat it!"

After that was silence. I know not how many interminable aeons I sat stupefied; whispering, muttering, calling, screaming into that telephone. Over and over again through those aeons I whispered and muttered, called, shouted, and screamed, "Warren! Warren! Answer me—are you there?"

And then there came to me the crowning horror of all—the unbelievable, unthinkable, almost unmentionable thing. I have said that aeons seemed to elapse after Warren shrieked forth his last despairing warning, and that only my own cries now broke the hideous silence. But after a while there was a further clicking in the receiver, and I strained my ears to listen. Again I called down, "Warren, are you there?", and in answer heard the thing which has brought this cloud over my mind. I do not try, gentlemen, to account for that thing—that voice—nor can I venture to describe it in detail, since the first words took away my consciousness and created a mental blank which reaches to the time of my awakening in the hospital. Shall I say that the voice was deep; hollow; gelatinous; remote; unearthly; inhuman; disembodied? What shall I say? It was the end of my experience, and is the end of my story. I heard it, and knew no more. Heard it as I sat petrified in that unknown cemetery in the hollow, amidst the crumbling stones and the falling tombs, the rank vegetation and the miasmal vapours. Heard it well up from the innermost depths of that damnable open sepulchre as I watched amorphous, necrophagous shadows dance beneath an accursed waning moon. And this is what it said:

"YOU FOOL, WARREN IS DEAD!"

Y Scaa Harrish Innsmouth: Y Faishneyr

By haittin lhiam faagail y barroose, as hie mee çhelleeragh dys shamyr ‘ailt boght y thie oast son dy hashtey y kishtey troailtys aym. Cha row agh un fer ry-akin—shenn dooinney gyn y “blass Innsmouth”, myr va mee smooinaghtyn er nish—as reih mee gyn feysht jeh er ny cooishyn va boirey orrym. Chooinnee mee dy row ad er vakin reddyn quaagh ‘sy thie oast shoh. Ny share, hooill mee ‘sy cherrin—va’n barroose ersooyl hannah—as cur shilley kiarailagh as smooinaghtagh er y reayrtys.

Va linney jeeragh ny h-awiney er un çheu y cherrin feayn mooirlaigagh. Va lieh-chiarkyl dy hieyn breekey er sceau er y çheu elley, ass amm 1800 er lhiam. Heeyn straiddyn nyn drooid lesh y jiass, sheear-yiass as shiar-yiass. By ghoan ny sollyssyn v’ayn, as ad nyn sollyssyn bane heh gyn monney bree. Va boggey mooar orrym dy row eh foym faagail roish y cheeiraght, ga dy nee eayst yial v’ayn noght.

Quailtys

Quailtys

Lesh goaill arrane ayns ny raaidyn mooarey, as jummal traa marish contoyrtee hrullee, hie Foaynoo shaghey y vard.

As ren y bard foast atteeyn beggey ass arrane jee, dys jesheenaghey e baaish eddin ayns quaillyn Hraa; as 'syn ynnod oc, cheau ish foast ny slonganyn gyn feeu hilg feallee annymoil huick ‘sy raad, jeant jeh reddyn çherraghtagh.

As lurg tammylt, tra hooar ny slonganyn baase, boallagh y bard çheet jee as atteeyn arrane echey jee; as boallagh ee gearey er as ceau foast ny slonganyn gyn feeu, ga dy dooar ad rieau baase ‘syn ‘astyr.

As laa dy row as eshyn sharroo hug y bard oghsan jee, as gra: “Foaynoo aalin, eer fo-raad as fo-straaid cha nel oo shaghney gearey orrym as yllagh as spotçhal marish riftanyn, as mish t’er dooilleil er-dty-hon as er nreamal jeed, t’ou craidey moom as goll my haghey.”

As hyndaa Foaynoo e h-eddin jeh as shooyl voish, agh lesh faagail yeeagh eh harrish e geaylin as mynghearey er mongey nagh row eck roie, as, faggys myr hannish, dooyrt ee:

“Higym dty whaiyl ‘sy ruillick çheu-chooylloo Hie ny Moght ayns keead bleeaney.”

---

The Assignation

Fame singing in the highways, and trifling as she sang, with sordid adventurers, passed the poet by.

And still the poet made for her little chaplets of song, to deck her forehead in the courts of Time: and still she wore instead the worthless garlands, that boisterous citizens flung to her in the ways, made out of perishable things.

And after a while whenever these garlands died the poet came to her with his chaplets of song; and still she laughed at him and wore the worthless wreaths, though they always died at evening.

And one day in his bitterness the poet rebuked her, and said to her: "Lovely Fame, even in the highways and the byways you have not foreborne to laugh and shout and jest with worthless men, and I have toiled for you and dreamed of you and you mock me and pass me by."

And Fame turned her back on him and walked away, but in departing she looked over her shoulder and smiled at him as she had not smiled before, and, almost speaking in a whisper, said:

"I will meet you in the graveyard at the back of the Workhouse in a hundred years."

---

Ta'n skeealeen shoh çhyndaait ass The Assignation liorish yn Çhiarn Dunsany. Ta'n lioar vunneydagh ry-lhaih er Project Gutenberg.