Aggyrt eddyrashoonagh liorish studeyryn son yl-raghys ayns tarmaynys

Ta'n screeuyn foshlit shoh screeuit ec yl-phossan dy studeyryn as roie-studeyryn tarmaynys. T'ad gaghin son aght ynsee noa ayns studeyrys tarmaynagh, son nagh vel yn ynsaghey t'ayn dyn nyannoo aarloo da rieughid tarmaynys chamoo dy 'eaysley feer 'eyshtyn y teihill. Ta carrey aym goaill ayrn scanshoil 'sy ghleashaght, as myr shen ta mee clashtyn reddyn myechione; er lhiam dy neeu eh Gaelg y chur er screeuyn shoh myr beggan naight. Fow oo y screeuyn bunneydagh ec http://www.isipe.net/open-letter/.

Aggyrt eddyrashoonagh liorish studeyryn son yl-raghys ayns tarmaynys

Cha nee farrys y teihill ynrican ta fo gheyre-ghaue. Ta ynsaghey tarmaynagh fo gheyre-ghaue myrgeddin, as ta cummaght echey er cooishyn foddey jeh boallaghyn ollooscoillyn. Ta cooid ynsee kiaddey barelyn as smooinaghtyn crooteyryn polaase, as myr shen t’eh kiaddey ny sheshaghtyn ta shinyn cummal ayndaue. As shin 42 heshaght studeyryn tarmaynys ayns 19 çheeraghyn, er lhien dy vel y traa er jeet dy yannoo aavriwnys noa er aght ynsee tarmaynys. Cha nel shin bwooiagh dy vel cooid y choorse er geyllaghey dy trome rish y feed blein s’jerree. Ta’n dolley caghlaays smooinaght shoh lhiettal ynsaghey as ronsaghey, agh ny smessey foast, t’eh lhiettal nyn ablid dy ghellal rish feyshtyn yl-eddinagh y 21oo eash – anchorraghys argidoil, shickyrys beaghey, caghlaa speyr. Shegin dooin aachur cooishyn yn ‘eer seihll stiagh ‘sy çhamyr vrastyl, chammahs resoonaght as caghlaaghyn sheiltynys as saase. Nee shen cooney lhien y magher y yannoo ass y noa, as fy-yerrey dy chroo çhymbyllaght chooie dy yientyn freggyrtyn da feyshtyn sheshaght.

Harrish cagliaghyn, ta shin gaghin arraghey. Cha nel shin lhiggey er dy vel freggyrt slane jeant ain, agh cha nel ourys erbee ain dy yinnagh eh foays da studeyryn tarmaynys bentyn rish caghlaaghyn reayrtys as barel. Veagh yl-raghys cooney lhien lhiasaghey ynsaghey as ronsaghey, as cur bee noa stiagh ‘sy vagher; dy jarroo, ta niart ec yl-raghys dy aawhingaghey tarmaynys son shirveish y theay. Shegin dooin cur tree sorçhyn yl-raghys ec mean y choorse: sheiltynagh, saasagh as eddyr-cheirdagh.

Ta yl-raghys heiltynagh cur trimmid er yn ‘eme dy haishbyney reih s’lhea dy lughtyn tuarym ‘sy choorse. Cha nel shin shassoo noi mynphoyntyn tradishoon tarmaynagh er lheh; cha nee reih çheu ta bun yl-raghys. Share lhien greinnaghey resoonaght lane smooinaght, as ynsaghey dy chosoylaghey barelyn dy cremeydagh. Ta keirdyn elley cur failt er yl-raghys as gynsaghey sheiltynyssyn do-chohassoo; son y chooid smoo, t’ad taishbyney tarmaynys myr çhaglym dy smooinaght unnaneit. Dy jarroo, ta caghlaays sthie ‘syn ard-tradishoon, agh cha nel agh un aght t’ayn dy yannoo tarmaynys as toiggal y feer seihll. Cha nel y lheid ry-akin ayns keirdyn elley: quoi goghe rish coorse keim shickoaylleeaght nagh verragh geill agh da Freudaghys, ny rish coorse politickagh ta cur tastey ynrican da soshiallys steat? Lhisagh ynsaghey tarmaynagh ooilley-ghoaillys cummalagh ve troggit er taishbyney corrym jeh ymmodee reayrtys sheiltynagh, veih ny saaseyn noa-chlassicagh ta goll er ynsagh dy cadjin, dys tradishoonyn classicagh, lurg-Cheynesagh, commynagh, eggoaylleeagh, bwoirrinagh, feminagh, Marxagh as Austeyragh (mastey fir elley) ta faagit magh son y chooid smoo. Shimmey studeyr tarmaynys ta geddyn keim gyn eer bentyn rish lheid ny reayrtyssyn ‘sy çhamyr vrastyl.

Chammah’s shen, shegin da bun-choorseyn goaill stiagh fo-choorseyn ta taishbyney coheks as çhymbyllaght as ta gientyn smooinaght ghooghyssagh mychione tarmaynys as saaseyn tarmaynagh per se, goaill stiagh fallsoonys tarmanys as sheiltynys toiggalys. Er y fa nagh nod oo toiggal sheiltynys dy slane gyn çheet er y choheks shennaghyssagh chur er bun ad, ta feme er taishbyney oardrailagh da shennaghys smooinaght harmaynagh, screeuyn classicagh er tarmaynys, as shennaghys tarmaynagh. Ec y traa t’ayn, ta lheid ny bun-chooishyn seiht da çhemmalyn coorseyn tarmaynagh, ny cha nel ad ayn.

Ta yl-raghys saaseagh gra dy nhegin da tarmeynee jannoo ymmyd jeh teiy s’lhea dy ghreieyn son dy ‘eaysley feyshtyn tarmaynagh. Dy baghtal, ta maddaght as staddyssaght ard-scanshoil ‘sy cheird. Agh ro-vennick ta studeyryn gynsaghey saaseyn mooadagh gyn rieau resoonagh magh my lhisagh ad jannoo ymmyd jeu as cre’n fa lhisagh, ny cur geill da ny reih vinn t’ad gobbraghey orroo, ny cooieid ny h-eiyrtyssyn. Chammah’s shen, shimmey ayrn tarmaynys t’ayn nagh vel ry-hoiggal liorish saaseyn mooadagh nyn lomarcan. Son obbyr harmaynagh fondagh, shegin dooin jannoo co-ymmyd jeh saaseyn mooadagh chammah’s saaseyn oaylleeaghtyn sheshoil elley. Myr sampleyr, yinnagh eh shareaghey toiggalys commynyn as cultoor dy verragh ad ny smoo geill da saaseyn quallidagh ‘sy choorse tarmaynagh. Agh son y chooid smoo, cha nel studeyryn tarmaynagh goaill ayrn ayns brastyl erbee mychione saaseyn quallidagh.

As fy-yerrey, lhisagh ynsaghey tarmaynagh goaill stiagh saaseyn eddyr-cheirdagh, as lowal studeyryn dy chur geill da oaylleeaghtyn sheshoil elley chammah’s studeyrys-sheelnaue. She oaylleeaght heshoil ee tarmaynys; s’goan ta phenomena tarmaynagh crampey ry-hoiggal my t’ad goll er taishbyney nyn lomarcan, gyn coheks sheshoaylleeagh, politickagh as shennaghyssagh. Dys resooney magh polaase tarmaynagh dy fondagh, lhisagh studeyryn toiggal cummaghtyn sheshoil foddey as bree moralagh ny briwnyssyn tarmaynagh.

Bee caghlaaghyn aght ayn dy chooilleeney lheid yn yl-raghys ayns caghlaaghyn boayl, agh shoh kuse dy eieyn son cooilleeney ad:

• Failley ynseyderyn as ronseyderyn verr lhieu yl-raghyn sheiltynagh as saaseyn stiagh ‘sy choorse tarmaynagh;
• Croo teksyn as greieyn ynsee elley dys cummal coorseyn yl-raghyssagh;
• Jannoo oikoil co-obbraghey eddyr rheynnyn oaylleeaght heshoil as rheynnyn studeyrys-sheelnaue, ny cur er bun sar-rheynnyn verr rick er coorseyn eddyr-cheirdagh ta mestey tarmaynys as keirdyn elley.

Bee dooillee eh caghlaa reddyn – s’dooillee eh dy kinjagh. Agh t’eh er bun hannah. Ta studeyryn er feie ny cruinney er ngoaill toshiaght dy chaghlaa reddyn keim er cheim. Ta shin er lhieeney hallaghyn leaght ayns leaghtyn shiaghtin liorish loayreyderyn cuirrit, er cooishyn nagh vel ry-akin ‘sy choorse; ta shin er reaghey possanyn lhaih, keirdlannyn, cohagglooyn; ta shin er mynscrutaghey coorseyn jeinagh as er nyannoo cummaghyn jeh coorseyn elley; ta shin er ngoaill toshaight ynsaghey shin hene as sleih elley ny coorseyn noa by vie lhien dy jagh ad er ynsaghey. Ta shin er chur er bun sheshaghtyn ollooscoillagh, as er naase moggylyn ashoonagh as eddyrashoonagh.

Shegin da caghlaa aase ass ymmodee buill. Myr shen, nish ta shin cur failt orroo – studeyryn, tarmaynee, neu-harmaynee – dy heet stiagh marin as troggal y glout femoil son caghlaa. Jeeagh er Support us (cooney lhien) dy haishbyney dy vel oo marin as dy chiangley rish ny moggylyn ain ta gaase foast. Trooid as trooid, ta yl-raghys ayns ynsaghey tarmaynagh femoil son resooney pobbylagh sunt. She cooish deynlaght t’ayn.

Fo-screeuit, bun-heshaghtyn yn International Student Initiative for Pluralism in Economics:

Sociedad de Economía Crítica Argentina y Uruguay
Society for Pluralist Economics Vienna
Nova Ágora
Mouvement étudiant québécois pour un enseignement pluraliste de l'économie
Estudios Nueva Economía
Grupo de estudiantes y egresados de la Facultad de Economía y Negocios de la Universidad de Chile
Det Samfundsøkonomiske Selskab (DSS)
Post-Crash Economics Society Essex
Cambridge Society for Economic Pluralism
Better Economics UCLU
Post-Crash Economics Society Manchester
SOAS Open Economics Forum
Alternative Thinking for Economics Society, Sheffield University
LSE Post-Crash Economics England
Pour un Enseignement Pluraliste de l'Economie dans le Supérieur (PEPS-Economie)
Netzwerk Plurale Ökonomik (Network for Pluralist Economics)
Oikos Köln
Real World Economics, Mainz
Kritische WissenschaftlerInnen Berlin
Arbeitskreis Plurale Ökonomik, Bayreuth
Arbeitskreis Plurale Ökonomik, München
Oikos Leipzig
Was ist Ökonomie, Berlin
Impuls. für eine neue Wirtschaft, Erfurt
Ecoation, Augsburg, Germany
Kritische Ökonomen, Frankfurt
Arbeitskreis Plurale Ökonomik, Hamburg
Real World Economics, Heidelberg
Stundent HUB Weltethos Institut Tübingen
LIE - Lost in Economics e.V., Regensburg
Javadhpur University Heterodox Economics Association
Economics Student Forum - Tel Aviv
Economics Student Forum - Haifa (Rethinking Economics)
Rethinking Economics Italia
Oeconomicus Economic Club MGIMO
Glasgow University Real World Economics Society
Movement for Pluralistic Economics
Post-Crash Barcelona
Asociación de Estudiantes de Económicas de la Universidad Autónoma de Madrid
Lunds Kritiska Ekonomer
Handels Students for Sustainability
PEPS-Helvetia
Rethinking Economics
Rethinking Economics New York
Sociedad de Economia Critica

Er ollooyn eddyrashoonagh

English version below.

Lhaih mee yn art shoh moghrey jiu: Academics Anonymous: international staff suffer raw deal from universities

She eie anaasoil t'ayn, agh bare lhiam fakin ny smoo fysseree er y chooish. Er lhiam dy nee cubbylyn ta bun smoo y doilleeid. My t'ou uss cummal ayns y Reeriaght hannah as y sheshey ayd caghlaa staartey, dy cadjin foddee oo freayll y staartey t'ayd hannah. Foddee oo cummal seose cooish ghraih foddey rish tammylt, derrey fow uss staartey ny s'faggys da'n boayl noa, ny foddee fer jiu troailtey. Cha nel monney caa ayn dy vow shiu daa staartey ollooscoillagh lane-emshiragh beayn 'syn ynnyd cheddin ec y traa cheddin; myr shen, my t'ou uss geiyrt er sheshey ass çheer elley, cha nel monney caa ayd dy 'eddyn staartey dy leah. Ta teiy ayd: goaill rish staartey nagh vel 'syn ollooscoill (as gyn screen yn art shoh), ny goaill rish staartey ollooscoillagh nagh mie lane chooie dhyt.

Er lhiam dy nee feme (feer ny far) dy hannaghtyn 'syn "teihll ollooscoillagh" ta bun y cheisht, son t'eh cur stiagh feme elley mastey ny cummaghtyn t'ort rish shirrey staartey. As feme ort dy gheddyn staartey faggys da'n çheshey, as ec y traa cheddin, ta sleih goaill rish staartaghyn nagh goghe ad rish jeh yioin. S'cosoylagh dy vel y red cheddin ry-akin mastey cubbylyn ta gobbraghey ayns sur-vagher erbee.

Jeeaghyn er y chooish ayns aght elley, ta mee çhelleeragh fakin kiare cummaghtyn er y teiy. S'cosoylagh dy bee eh ort lhiggey lesh fer jeu:

Foddid: by vie lhiat staartey faggys da'n çheshey ayd
• Coorse: by vie lhiat ve mie er enney 'sy vagher keirdagh ayd, as cummal seose y schlei ayd.
• Argid: shegin dhyt feddyn staartey dy leah dys eeck ny billaghyn.
• Quallid: t'ou shirrey reddyn er lheh ass y staartey, m.s. ooashley, sorçh dy obbyr t'ayn, çhymbyllaght obbree a.r.e.

As nyn mast'oc, she quallid y red sassey dy lhiggey lesh, as t'eh gientyn lheid yn art. My t'ou lhiggey lesh yn argid, ta shin lhaih artyn ta gra nagh vel un 'aill olloo lane-emshiragh cooie dy chummal seose cubbyl ny lught-thie. My t'ou lhiggey lesh y choorse, ta shin lhaih artyn er "cur magh ny fioghee", anchorrmid keintys ayns ollooscoillyn*, as cre'n fa ta sleih faagail yn seihll ollooscoillagh. My t'ou lhiggey lesh foddid, ta shin lhaih artin er doilleeidyn cormaghey coorse as bea my t'ou dy olloo.

*Ta ourys aym, kyndagh rish anchormid faill as cultoor, dy vel ny smoo ollooyn firrynagh garraghey as sheshey bwoirrin geiyrt orroo, na'n aght elley. Cha nel y fysseree aym. Foddee chammah dy vel eh ny s'doillee da ollooyn bwoirrin feddyn staartey noa my t'ad arraghey.

Trooid as trooid, er lhiam nagh vel eddyrashoonaght y pheiagh bentyn rish y chooish. Er lhiam dy nee shirrey daa staartey ooashley sur-cheirdagh lane-emshiragh ayns ard beg ec y traa cheddin (as costreeu agglagh ayn son ny staartaghyn shen, as cha nel ny currymee caghlaa dy mennick, as cha nel ad ayn agh ayns shiartase dy chaayryn er lheh) ta bun y chooish.

---

I read this article this morning:

It’s an interesting point, but I’d like to see some more data on the topic. I suspect a major cause of the problem is likely to be couples. If you’re moving within the UK, it's often feasible for the already-employed partner to retain their job, either having a medium-distance relationship for a while until they can find a job nearer the new place, or with one partner (or both) commuting. The chances of getting two permanent academic jobs in the same area at the same time are very limited, so if someone follows their partner from abroad, they’re unlikely to get one quickly. This means a choice: either taking a non-academic job (in which case you don't write this article) or taking a much less appealing academic job. I suspect the root problem here is simply that a perceived or real need to remain "in academia" is a substantial additional factor in jobseeking. Coupled with the need to find a job near a partner, and at around the same time, people end up taking jobs they ordinarily wouldn't. I imagine the same problem applies in most specialised fields. To look at it another way, I can immediately think of four factors in the decision. It’s very likely that you’ll have to compromise on at least one: Distance: you want to work near your partner. Career: you need to maintain a name in the field and your career skills. Financial: you need to get a job fairly soon to pay the bills. Quality: you want certain things out of the job, such as prestige, the nature of the work, conditions and so on. Of these, quality is perhaps the easiest to compromise and leads to this article. If you compromise on finance, we get articles on how a single academic salary isn’t enough to support a couple or family. If you compromise on career, we get articles on “publish or perish”, gender imbalance in universities*, and why people left academia. If you compromise on distance, we get articles on the difficulties of juggling career and relationship for academics. *I suspect that because of pay discrepancies and cultural tendencies, there are statistically more male academics moving and taking female partners with them than the other way round. It may also be harder for female academics to get a new job after moving. On the whole, my take is that this is very little to do with staff being international, and very much to do with trying to find two full-time high-prestige specialist jobs within a small geographical area, when said jobs are limited to specific cities, subject to furious competition and have relatively low turnover.

Coir rioee chimmeeagh?

V'eh ry-yerkal, gyn ourys, agh she skeeal mie t'ayn ny yei shen. Ta ronseyderyn er ngeddyn feanish dy dug magh coyr rioee "inçhynagh" post-l spammagh.

Ren Proofpoint (ny cholught shickyrys fysseree) cronnaghey soiaghey spammagh rish y Nollick. Hug ny kimmee postyn-l tree keayrtyn 'sy laa er feie ny cruinney dys sleih as colughtyn, 100,000 'sy cheayrt. Cha daink agh 10 postyn-l ass enmys IP er lheh, myr shen by ghoillee eh ad y haghney liorish lhiettal IP. Y red anaasoil, shen dy daink 25 'sy cheead jeh jeshaghtyn elley, cha nel jeh co-earrooderyn tradishoonagh. Hooar ad çhaghteraghtyn daink ass "router" thie, jeshaghtyn yl-vean, çhellveeishanyn as coyr rioee; va co-earrooder as ablid eddyr-voggyl ec dagh fer. Son y chooid smoo nagh row ny kimmeeyn er mrishey jeshaghtyn sauçhey, agh er ngeddyn adsyn nagh row reaghit dy cooie hoshiaght, as adsyn ragh row er gaghlaa focklyn arrey jeh ny dug colughtyn er dagh fer. Myr shen, by aashagh eh ad y chleayney.

Cha nel mee goaill yindys kyndagh rish shen. Ta jeshaghtyn inçhynagh goaill stiagh co-earrooder dys geddyn fysseree as aawoalley yn aghtey oc rere eh, ny kiangley rish jeshaghtyn elley, agh ta'n ablid shen nyn vosley magh dys kimmee. S'doillee dy liooar eh cur er sleih co-earrooderyn tradishoonagh y choadey, gyn çheet er y choyr rioee! Mannagh vel jeshaght jeeaghyn dy ve ny cho-earrooder, s'cosoylagh nagh ver sleih my ner dy vel feysht ayn. Chammah's shen, cha nel eh baghtal cre'n feeu t'ec kimmee geddyn greim er coyr rioee - cha neeu eh boirey ort lesh stiurey eh, cha nel fysseree scanshoil aynsyn. Cha nel eh baghtal da cagh noadyr cre'n assee jeh my ghoys ad greim er noadys, ga dy dod veerys neuchramp cur er meeobbraghey er lhiam.

As erskyn shen, cha nel ny jeshaght jeant dy ve feer sauçhey. Dy cadjin, rere Proofpoint, cha nel eh aashagh da'n çhellooder kiangley roo as reaghey ad, dys aanoaghey claareyn noi-veerys as reddyn elley. S'doillee eh feddyn veeryssyn er y jeshaght mannagh vel corys-obbree cadjin oc, ny aght neuchramp dy obbraghey er. Cha nel coadey noi-veerys mie ry-gheddyn, cha nel claareyn oc ta shickyraghey as gaanoaghey lheid ny cooid vog, as cha nel skimmee coadee cur geill da'n 'eysht. Er lhiam nagh vel sleih smooinaghtyn dy baghtal - she co-earrooder t'ayn, myr shen t'eh lane scanshoil ad y choadey noi kimmee, son ta co-earrooder gyn coadey ny cho-earrooder gyn mainshtyr, as dy leah she co-earrooder kimmeeagh t'ayn. Ta co-earrooderyn feer ymmydoil da kimmee - ta niart co-earrooagh lhiggey daue brishey coryssyn scanshoil elley, my she glioonagh ny coyr rioee t'ad gaavainshtyr, she co-earrooder t'ayn.

She eiyrtys gyn shaghney t'ayn, er lhiam, as wheesh sleih cur wheesh jeshaghtyn elley er y voggyl (cre'n fa? cha nel mee toiggal), as toiggalys beg oc er sauçhys co-earrooder. Wahll, chammah's shen, she dooghys lhiastey t'ain, son y chooid smoo, as cha nel monney sleih coadey y co-earrooder hene oc, gyn çheet er jeshaghtyn elley. Cha neeu eh, ta shin lieh-chredjal, as shen dy liooar dooin gyn jannoo eh.

As rish 2020, myr shen, bee y kishtey stiagh ad lane dy soilsheenyn noa-Viagra hug y coyr rioee dhyt, as bee y jeshaght chaffee as y çhellveeishan cur co-chialg er bun dty varroo ass lieh possan kimmeeagh ayns çheer elley.

Coontey y Veeb

Skieltan aahjioogh clouit

Ta fys ayd, s'cosoylagh, dy vel anaase aym er cooishyn slaynt as aachuirrey. Shoh cooish noa: ta fir-lhee er chur aahjioogh noa da lhiannoo as aahjioogh faase echey. Ta çhingys goan ec y lhiannoo, myr shen ta lungane ny h-aahjioogh feer 'aase, as t'ee jee-volgey ny keayrtyn rish ennal. Shen cooish ghaueagh dy liooar, as son y chooid smoo cha nel ad feddyn magh ny ta taghyrt roish my dooar y lhiannoo baase.

'Sy chooish shoh, hooar magh ad y çhingys dy leah. Va ollee Glen Green as Scott Hollister, ec Ollooscoill Michigan, ronsaghey aght dy yannoo aachuirraghyn as stoo plastagh, polycaprolactone, ta lheie ersooyl beggan er veggan 'sy stoo kirpey. Cha row peiagh erbee er nyannoo lheid yn ymmyd jeh hannah, agh er y fa dy nee cooish vea as baase v'ayn, hooar ad kied egin jeh Reagheydys Bee as Stoo Lheeys ny SUA.

Ren ad jalloo-cronneyder jeh aahjioogh y lhiannoo, as kiaddey skieltan lane chooie jee. Eisht chlou magh ad y skeiltan aahjioogh ass polycaprolactone, as eh y 'uailley mygeayrt yn aahjioogh do nagh dod ish jee-volgey. Va'n lhiannoo ass y thie lheeys dy leah, as cha nel doilleeid erbee echey neayr's shen.

Blog yn ollee
Art earishlioar oaylleeagh
Art TIME

Lectraghys shooylagh

Ta Buffalo Grid (colught Lunninagh) prowal aght dy lhieeney shooylvaneyn liorish jeshaght lhieentagh ymmyrkagh ta croghey er soilshey ny greiney. Ayns çheeraghyn ennagh, cha nel lectraghys ry-gheddyn dy aashagh; t'eh ort shooyl ymmodee meeilaghyn dys balley as gienneyder pooar pedryl echey. T'eh deyr myrgeddin, faggys da faill lane laa 'sy çhiaghtin ny keayrtyn. As er y fa nagh vel monney tooryn çhellvane ayns ardjyn çheerey, ta'n çhellvane ceau ny smoo pooar dys troggal kiangley fondagh na ayns ardjyn as ram tooryn ayndaue.

Ta'n saase noa lughtey kishtaghan-pooar ymmyrkagh liorish soilshey ny greiney, as eh y chur gys balley ennagh er roar. Ta kionneyder cur çhaghter teks dys kionnaghey lectraghys: shen mysh 20% costys lectraghys gienneyder pooar. 'Sy traa ry-heet, by vie lesh Buffalo Grid ny colughtyn shooylvane y choyrlaghey dy cooney lesh y costys shen; nagh beagh sleih ceau ny smoo argid er shooylvaneyn dy beagh lectraghys ry-gheddyn gyn costys?

Chammah's shen, ta sleih jannoo ymmyd jeh shooylvaneyn er son dellan nish: kionnaghey reddyn ny eer geddyn faill. T'eh fo Buffalo Grid prowal elley y yannoo ayns Sierra Leone, raad ta delleyderyn caffee kiarail dy chionnaghey troar caffee liorish shooylvane. Ta'n lheid scanshoil ayns ynnydyn gyn coryssyn argidoil fondagh as sheer-ry-laue. Ta argid glass gaueagh dy liooar, nagh vel? Shen un fa nagh vel shin shooyl mygeayrt as lane phoagey d'airh ain (agh er lhiam dy noddin dy hurranse un cheayrt gyn assee...).

Art New Scientist er y chooish, liorish Anil Ananthaswamy.

2013-03-09, earroo 2907: "Text your way to a phone recharge"

Far-skeeah rauney

Mleeaney, ta daa phossan ronsee oaylleeagh er nyannoo far-skeeah rauney. Quoi ec va fys?

Screeu mee art er y chooish er yn ynnyd-eggey.

Kinectaghey

(naight as aaraaghyn ass New Scientist:“Kinect imaging lets surgeons keep their focus”, liorish MacGregor Campbell, 2012-05-17, earroo 2865)

Cha nel mee currit da çhaghnoaylleeaght er e hon hene, ny gadgetyn noadyr, agh t’eh cur bwooise dou tra ta sleih feddyn magh stoo noa as gientyn eieyn noa. Tammylt er dy henney haink rish y Nintendo Wii as y stiur gleashagh echey, as va shen anaasoil, beggan. Eisht haink rish y Microsoft Kinect, as hug eshyn orrym cur geill dy firrinagh. Cha chionnee mee nane – cha nel jeshaght-ghamman aym (she gammaneyr CP mish) as cha nel mee cliaghtey glackey er stoo noa, as aghterbee ta mee cloie gammanyn crampey as feme oc er feed crammanyn as lugh dyn stiurey – agh va ram sleih jannoo ram stoo marish dy tappee. Ta Kinect Hacks çhaglym y chooid smoo jeu (agh cha nel dagh hack ry-gheddyn ayns shen). Hoshiaght, va Microsoft shassoo noi ny h-ymmydyn gyn jerkallys shoh, agh hug ad my ner dy leah dy nee taghyrt yindyssagh v’ayn – ram sleih yannoo ymmyd jeh’n çhaghnoaylleeaght ocsyn as feddyn magh saaseyn as ymmydyn noa nagh beagh adsyn arragh er smooinaghtyn orroo. Crowdsourcing fondagh, nagh vel?

C’red ta’n sleih shen jannoo, myr t’eh?

• T’ad stiurey çhellveeishanyn
• T’ad cloie gammanyn gyn stiur agh laueyn
• T’ad stiurey robotyn liorish gleashaght kirpey. Oddagh oo stiurey robot foddey jeed; ‘sy tampleyr shoh, t’ad lhiggey er dy vel oo stiurey robot ayns thie dy voir as cooney ish ga nagh vel oo thie.
• T’ad stiurey claareyn co-earrooder liorish gleashaght kirpey (rere çhaghnoaylleeaght ayns “Minority Report”)
• T’ad cloie greieyn as jannoo ellyn
• T’ad jannoo eab dy screeu claareyn ta toiggal çhengaghyn cowrit
• T’ad gynsaghey bea-oaylleeaght, liorish taishbyney craueyn er corp studeyr
• T’ad cooney doail dy hooyl mygeayrt gyn boalley noi reddyn
• T’ad gobbraghey er saaseyn dy yannoo laue-lheeys liorish Kinect as robotyn

Ta’n laue-lheeys hene goll er ronsaghey foast, agh ta Kinect çheet stiagh ayns obbraidlanyn ny yei shen. Ta laue-lhee ayns thie lheihys Guys’ & St. Thomas’ ayns Lunnin prowal ymmyd Kinect ‘syn obbraidlan. Ta’n laue-lhee cur cowraghyn kirpey da’n çhamraig dys shirrey, reih, as stiurey jallooyn er çhellveeishan.

Ta laueyn-lhee jeeaghyn er jallooyn lheihys scanshoil dy mennick car obbraid (m.s. caslyssyn scell-X ec y traa). Ta’n menkid croghey er yn torçh dy obbraid t’ayn as stayd y surransagh, agh dagh beggan minnid ny keayrtyn, as dagh oor ny keayrtyn elley. S’feer scanshoil eh freayll dagh ooilley red ‘syn obbraidlan lane shiast, as myr shen, my ta’n laue-lhee son scrutaghey jallooyn lheihys, t’eh ersyn glenney roish bentyn rish y cho-earrooder, as eisht glenney reesht roish my ghoys eh toshiaght reesht. Ta shen jummal traa as t’eh brishey jeean-tastey y laue-lhee myrgeddin. Noi shen, ta kuse dy laueyn-lhee croghey er cooneyder ta stiurey ny jallooyn, agh ta shen ny s’doillee na jannoo eh dy hene, as baanragh ny keayrtyn mannagh vel ad toiggal dy jeeragh ny t’ou çheet er. Foddym toiggal shen dy h-aashagh; s’doillee dy liooar eh ymmyrkey cooid thie mygeayrt marish peiagh elley, ny soilshaghey magh cre’n aght t’ou roshtyn thie ennagh, gyn çheet er scrutaghey tuarastyllyn roie 3T jeh corp bio! Ta lheid y red neufondagh, as myr shen ta gaue neuymmyrçhagh ‘sy y chooish.

Wahll, marish cooid vog er lheh, ta’n Kinect towse as toiggal cowraghey laue y laue-lhee, as ta shen lhiggey da stiurey ny jallooyn dy h-aashagh gyn glenney ny shirrey er cooneyder shen y yannoo er-e-hon.

She Tom Carrell eh y laue-lhee ren y chied ymmyd jeh’n chorys. Dooyrt eh:

“Derrey nish, va mee cliaghtey yllagh harrish y çhamyr da ny cooneyderyn çhaghnoil as shirrey orroo y yalloo y stiurey, queeyllaghey troa ennagh, y troa elley, arraghey seose, as sheese, mooadaghey, scribbey...”

agh marish y Kinect

“va stiurey foddey-oaylleeagh aym.”

Chammah’s shen, v’eh ny sassey cummal seose geill car yn obbraid er yn oyr dy row eh aashagh geddyn ny jallooyn kiartey.

“T’ou jus jannoo ooilley’n stoo shoh gyn loayrt as t’eh taghyrt foddey ny s’tappee. T’ou cummal seose ryddim y chooish.”

Ren Carrell obbraid er 8 Mee ny Boaldyn dy charraghey att cuishley ayns cuishlin y chree. Cha row eh shickyr mychione y chorys hoshiaght, agh nish t’eh jeean dy yannoo ymmyd jeh reesht.

“Er lhiam dy beagh eh mertragh dy liooar ‘sy toshiaght, agh va mee jeant bwooise ec yn aght hie reddyn jiu.”

Dy dooghyssagh, cha nel y Kinect jeant er son lheid yn obbyr. Tra ren ad y jeshaght, v’ad sheiltyn çhamyr ‘sy thie raad oddagh oo lheimmey mygeayrt as skeaylley dty laueyn gyn boirey dys cloie gamman. Ta obbraid foddey jeh’n çheiltynys shen, lane dy ‘leih, jeshaghtyn, caabylyn, trensooryn, sollyssyn as reddyn elley; as cha cosoylagh eh dagh keayrt dy gheddyn daa laue seyr noadyr. Ren Gerardo Gonzales ec Microsoft Research Cambridge goaill ayrn ayns croo corys noa da’n obbyr, marish laueyn-lhee ass Guy’s & St Thomas’ and King’s College London. V’eh orroo reih straih dy chowraghyn oddagh laue-lhee cur aysn boayl cagleeit tra t’eh shassoo rish boayrd obbraidee. Ta cowraghyn cadjin jeant lesh un laue, do beagh y laue elley seyr er son yn obbraid: myr sampleyr, t’ad faagail cowrey er y jalloo liorish jeeraghey er as gra “cur cowrey”. Ny yei shen, ta feme er daa laue er son kuse dy obbraghyn ec y traa t’ayn – er lhiam dy bee ad gobbraghey er shen dy jeean.

S’mie lhiam fakin dy vel sleih jannoo wheesh ymmyd noa as ymmydoil jeh’n çhaghnoaylleeaght shoh. Cha nel mee gaccan noi ny h-eieyn elley, ny reddyn taitnyssagh ny ommidjagh t’ayn, ny smooinnee eh! Ta feme er taitnys ‘sy chruinney shoh, ta fys ec Jee, as va’n Kinect jeant myr greie cloie. Agh s’mie lhiam scheial deiney, as ny reddyn yindyssagh neuyerkallagh ta sleih croo, as erskyn ooilley tra t’ad shareaghey’n chruinney veg shoh. Bee’m cur geill da’n chooish shoh ‘sy tra ry-heet as ta ram anaase aym er feddyn magh ny haghyrys.

Double Fine Adventure

Vel fys ayd er y chooish Double Fine Adventure? Cha s’aym wheesh dy Ghaelgeyryn ta cur geill da gammanyn. Ta Double Fine Productions ny cholught gammanyn co- earrooder jeant jeh sleih ass LucasArts as colughtyn elley. Hug magh ad Psychonauts, gamman mie er enney chossyn ram moylley fy-yerrey ga nagh chreck eh dy mie ‘sy toshiaght (t’eh ny chlassic cultagh nish). Ta’n fer toshee oc, Tim Schafer, er nobbraghey er gammanyn ennoil contoyrtys Monkey Island, Day of the Tentacle as Grim Fandango.

Wahll er 3oo Toshiaght Arree, dooyrt Schafer ayns co-akin marish Digital Spy dy row eh er jebbal shalee Psychonauts 2 da ymmodee soilsheyderyn, agh cha row anaase oc er . Ga dy vel ard-jeeaneyderyn shirrey er y gamman y chroo, cha dod eh jannoo eh gyn argid fondagh.

The founder of Double Fine studios said that he receives daily requests for the sequel, but fans often do not understand how game publishing works.

"I mean I get a lot of, on Twitter or whatever, daily questions about Psychonauts 2. And I would love to do Psychonauts 2, I've actually pitched that to publishers several times and no-one has taken the bait so far," he told Digital Spy.

"I'd love to do that game, but I'd have to convince someone to just give me a few million dollars, that's all."

Shen y chied red.

Gyn jerkallys peiagh erbee, dreggyr Notch: "Let's make Psychonauts 2 happen. " She crooteyr Minecraft eh Notch (Markus Persson), as ta ram argid cosnit echey liorish y gamman shen ren eh gyn soilsheyder erbee.

Hug shen greesaght er ram sleih as ghow ad toshiaght cur ram geill da’n chooish. As shen y nah red.

Nish, s’treisht lhiam dy vel fys ec cagh er Kickstarter. Ta’n ynnyd-eggey shoh lhiggey dhyt ve dty yeih-aignagh, as dty varrantagh, da shaleeyn: shaleeyn ellynagh, ronsaghey oaylleeagh, troaryn noa çhynskyllagh, as reddyn elley. Ta 2 Player Productions ny cholught çhellveeish ta jannoo fillym feer-skeealagh bentyn rish cultoor as colughtyn gamman co- earrooder. T’ad hannah jannoo feer-skeeal Minecraft : the story of Mojang liorish argid cosnit liorish Kickstarter . Eisht va anaase oc er nyannoo feer-skeeal bentyn rish Double Fine as yn aght t’ad jannoo gammanyn. Dooyrt Schafer nagh by chosoylagh eh fillym jeeragh y yannoo dy beagh laue soilsheyder ‘sy chooish, as adsyn er son gurneil dy cruinn y fys as co- yalloo harragh magh. Cha row argid ec y ghaa cholught dy yannoo gamman gyn cooney soilsheyder, as myr shen reih ad dy reaghey argid ec y theay liorish Kickstarter.

Schafer: We were talking about what game we could have access to because if we were using one of the games in production, the publisher might not like that, they might not like their coverage of that being so broad. We were worried about secrets and unannounced stuff and all the hassles of getting approval for everything, so we thought: “Let’s just start a new project and we could have Kickstarter fund that, too.”
http://www.giantbomb.com/news/16-million-and-counting/3981/

Ec y traa cheddin, v’ad smooinaghtyn er y ghamman myr shallee beg oddagh ve ny vun da’n ‘eer-skeeal, cha nel myr “ feer “ ghamman per se. Er shen, reih ad gamman contoyrtys er y fa nagh vel lheid y ghamman goll er croo dy mennick jiu (wahll, cha nel ec colughtyn ennoil; ta crooteyryn neuchrogheydagh as ard-jeeaneyderyn ad y yannoo ny keayrtyn er ping ruy). Cha nel soilsheyderyn gamman cur geill daue; cosoylit marish gammanyn LKP* as cloiederaght wooar oc, cha nel ad cosney monney argid as ta soilsheyderyn cruinnaghey er ny gammanyn ta cosney smoo. Agh ta shennaghys fondagh ec Double Fine er nyannoo gammanyn contoyrtys mie, as s’mie lesh Schafer lheid ny gammanyn. Er lesh dy row cloiederyn ayn nagh vel goll er tendeil liorish gammanyn jeianagh, agh by vie lhieu gammanyn contoyrtys reih -as- crig ny s’melley as ny s’meeiney dy cloie. Ta mish nyn mast’oc; cha nel mee mie ec LKPyn er chor erbee, agh s’mie lhiam ronsaghey seihill noa as feaysley feyshtyn. As myr haghyr eh, t’eh jeeaghyn dy vel sleih ayns coardailys rhym. Ghow toshiaght yn aghin Kickstarter er 7oo Toshiaght Arree shirrey $400,000; shen kerroo da’n ‘eer-skeeal as tree kerrooyn da’n ghamman hene, as er lesh Schafer she yn argid sloo oddagh ad jannoo gamman lieh -vie liorish, ga dy beagh eh ‘fo langeid’.

...it was going to be a cool, cute, little fun game, but it would probably be kind of hobbled as far as adventure games go. It wouldn’t have compared [to] Day of the Tentacle or our old games because it was going to be a fraction of the price.
http://www.giantbomb.com/news/16-million-and-counting/3981/

Hebb ad leaghyn da sleih hug symm daue: coip jeh’n ghamman er son $15, jeh’n fillym as y ghamman er son $30, as jeh lioar shalee (chammah’s y fillym as y ghamman) er son $60. Va forum cowag ayn da cohoyrtee coloayrt er y ghamman, as reddyn elley. As shen y treeoo red.

As eisht: rouan.

Rish 9 ooryn 9 ooryn va’n $400,000 cosnit oc. Rish laa, va $1 millioon oc. Ta ny smoo cohoyrtee ec y çhalee na v’ec shalee Kickstarter erbee rieau. Rish jerrey’n aghin, va ny smoo na $3,000,000 oc.

Tree millioon dollar. Mysh £2,130,000.

My t’ou cur geill da’n naight, shen argid shiaght bleeantyn da’n Vunscoill – agh cha nel lheid y chosoylagh ymmydoil, er lhiam. Ta’n argid shen ny smoo na’n daa ghamman laadey neose s’noa oc, Costume Quest as Stacking, as ad jeant er son $2 villioon y pheesh. Agh ta leagh gammanyn “AAA” foddey ny smoo: $10 millioon er son un chorys, as $50 millioon er son gamman yl-choryssagh. Ta kuse jeu consey erash yn argid ayns thurrick: chossyn Halo 3 $170m ‘sy chied laa, er leagh mysh $30m (BBC).

Credjal dy vel shen leagh agglagh da eer ghamman co- earrooder? Wahll, er lhiams chammah dy vel, agh scuirr tammylt, eh? Quoid ta poageen fillym Hollywood? Eddyr $100 as $200 ayns ny 200yn leah. Dy ghra myr shen, keead wheesh ny smoo . Ghoym rish dy vel aghteyryn ennooil as ooilley shen ‘sy chooish nagh vel (son y chooid smoo) ayns gamman. Cha s’aym cre’n oyr dy vel feme ec fillymeyr erbee cur feed millioon dollar da peiagh erbee tra ta aghteyryn elley ass towse ry-gheddyn, agh shen skeeal elley. Smooinee, ta fillym cadjin ny sloo na daa oor. Ta beggan gammanyn neuchrogheydagh oor ny ghaa er lhiurid, agh t’ad goan. Ta gammanyn cadjin 5 ooryn er y chooid sloo, gyn çheet er cooid reihyssagh. Ta 10-20 ooryn ny s’menkey, as bentyn rish GCPyn as y lheid, cha nel 50 ooryn red yindyssagh (Xbox & PC). Shen y traa dy chloie un cheayrt, gyn çheet er gammanyn as yl-chloie oc (cloie noi cloiederyn elley), ny gammanyn oddagh oo ad y chloie ymmodee keayrtyn ayns caghlaaghyn aght (myr GCPyn).

Myr shen, ta gamman cur dhyt foddey wheesh ny smoo cooid (myr ta “ cooid ” y traa taitnyssagh ta ry-gheddyn ass), 30 wheesh ny keayrtyn. Cha nel shen moal er rheynn beg jeh’n argid cheddin.

Aghterbee, as yn argid shen cosnit oc, ta Double Fine er gaghlaa y shalee va foue. Ayns ynnyd jeh gamman beg quaagh, t’ad jannoo lane ghamman vees ry-gheddyn er dagh corys smoo as bee coraaghyn ry-chlashtyn ayns queig çhengaghyn (Baarle, Frangish, Germaanish, Iddaalish as Spaainish – gyn Gaelg, atreih!). Chammah’s shen, t’ad er chur stiagh aundyryn elley da cagh hug ram argid daue: ellyn bunneydagh er son $5000 (as dagh ooilley aundyr elley); bee as cowag marish y lught er son $10000 (adoae); goaill ayrn ‘sy ghamman myr karracteyr er son $50,000 (adoae); as eer geddyn coip bunneydagh coadit oor-noa jeh kied ghamman Schafer, fer jeh kiare t’echey foast (adoae) er son $150,000! Ta mee credjal dy vel ad ooilley goit ec sleih.

Schafer says all of the donated money will go towards making the product bigger and better. It will now launch on multiple platforms, including PC, Mac, Linux, iOS, and Android. It will also feature voice acting and localized text in French, German, Italian, and Spanish.
http://venturebeat.com/2012/02/21/double-fines-tim-schafer-on-kickstarter-success-i-did-not-expect-this-interview/

Cre’n scansh? Er lhiam nagh nee toshiaght irree magh cadjin ‘syn aght ta gammanyn goll er jannoo. Cha noddagh y chooid smoo dy ‘leih geddyn wheesh argid; ta ram oayllys as shennaghys prowit ec Schafer as Double Fine; hayrn Notch anaase ram sleih da’n chooish liorish çheet er Psychonauts, as hug ad geill tannaghtagh da Double Fine ga nagh nee Psychonauts 2 t’ad jannoo nish; as erskyn ooilley, v’adsyn y chied. Ta noaid cur blass anaasoil er reddyn nagh bee er y nah eab ec colught elley. Ny yei shen, nee colughtyn elley yn eab, as haink rish eh er son kuse jeu (as brishee fir elley).

Er y laue elley, ta’n chooish cowraghey dy baghtal dy vel ram sleih ayn as anaase oc er gammanyn elley, gammanyn nagh vel casley rish ny fir smoo ta soilsheyderyn cur argid daue. Foddee dy nee ee ad y ghreinney dy chur ny smoo geill da reddyn quaagh daue,as bee seihll cloie ny smoo anaasoil er son shen. Shoh mish as treisht orrym dy nee.

GCP: Gamman Cloie Paart (Role-Playing Game), gamman raad t'ou uss goaill ort hene enney karracteyr as goaill ayns 'sy vea-skeeal oc. Son y chooid smoo ta feyshtyn, caggey as bishaghey persoonagh ayn. LKP: Lhiggeyder Kied Phersoon (First Person Shooter), gamman raad t'ou uss jeeaghyn trooid sooillyn fer caggee ennagh as goaill ayrn ayns caggey liorish lhiggey fir ny cretooryn ny robotyn a.r.e.

Menkid lettyryn Yernish er son coadey as cronnaghey eash screeuee

Rere yn Irish Times, ta caillin er veddyn magh saase noa dy hickyraghey teksyn Yernish. Ren Aoife Gregg oltscarrey menkid lettyr er 15,000 fockle veih ynnyd-eggey'n phabyr-naight Foinse, liorish towse lettyryn, daalettyryn as treelettyryn. Ren ee cosoylaghey ny h-eiyrtyssyn marish teks giare as geddyn towseyn cosoylagh. Hooar ee sambyl towse fondagh, as A, I, H as N smoo cadjin 'syn oardagh shen.

Erreish da'n eiyrtys shen, ghow ee toshiaght jannoo studeyrys er menkid lettyryn ayns shenn docamadys as scrutaghey caghlaaghyn shennaghyssagh. Va scanshyn eddyr menkid lettyr ny docamadyn; myr sampleyr, ta A as H foddey ny s'cadjiney jiu. Hooar ee dy dod ee cronnaghey eash ny docamadyn, as shen cruinn dy liooar so y chooid smoo (ren 7 ass 10 prowaltyssyn coardail rish y traih eash ta ard-scoillaryn cur orroo).

Chammah's shen, ren sambylyn menkid as cochiangley lhiggey jee jee-choadey çhaghteraghtyn v'er nyn coadey eck hene ny ec sleih elley. Myr sampleyr, roish H ta C smoo cadjin, as eddyr A as R ta Í smoo cadjin.

Ec y traa t'ayn, s'treih lhiam gra, cha noddym feddyn teks yn obbyr hene. Ta feeshag ry-akin er YouTube jeh Aoife soilshaghey'n obbyr eck.